Kulomunye oweZimbabwe obhubhe kweleBotswana ngemva kokuqhamuka kokulwisana kwelinye ijele akade epika khona kulelolizwe.
Kunje kulabeZimbabwe abedlula amakhulu amahlanu-500, abavalelwe emajele akweleBotswana. Isikhulumi esikhangele amajele kweleBotswana, umnunzana Oagile Kojane uthi kuqhamuke ukulwa ngempelaviki ejele leMaun, engenyakatho kwelizwe.
Phakathi kokuxokozela omunye oweBotswana, ulimaze uMichael Phuthi oweZimbabwe obeleminyaka engamatshumi amathathu lanye (31). UPhuthi uthwalelwe esibhedlela elimele kakhulu, lapho edlulele khona izolo.
“Ugijinyiselwe esibhedlela kodwa ngenxa yokulimala kwakhe uhle wadlula. Sisaxhwayisisa ukuthi kungabe kuhambe njani.”
Owe Botswana, umnunzana Osego Mosetlhane obulele uPhuthi umiswe phambi komthethwandaba namuhla esetheswa icala lokubulala.
Ukulwa phakathi kwabapikayo besemajele abeBotswana kanye labeZimbabwe kuvamile, kodwa bekungavamanga ukuthi kucine kuthathe umphefumulo.
Kusenjalo, kulemuli ekhala ngokuthi indodana yabo, uFortune Ndlovu, usehlaliswe ejele kweleBotswana okudlulisa amalawulo.
Udadewabo kaNdlovu, uGugu Ndlovu uthi umfowabo kwakumele aphume ejele nyakenye ngoNtulikazi, elokhe wavalelwa ngomnyaka ka2014.
"Umfowethu wabotshwa ngo2014, abanye ayebotshwe labo bakhululwa nyakenye. Yena kakhitshwanga, bamkhipha kweyinye ijele bamusa kweyinye."
Uthi wathi ebuza ukuthi kungani engakhululwanga, uthi bamtshela ukuthi imuli kumele afike ukuze bamuphe izizatho.
"Uthi uyesaba ukuqhubeka esejele. Iqgwetha lasitshela ukuthi kumele uhulumende amuphe imali yokumgcina isikhathi eside ejele. Manje kulezinsuku kunzima ukukhuluma lomnewethu, angazi ukuthi kuhamba njani.”
Ugatsha olubona ngezamajele kweleBotswana lutshele intathelizindaba ukuthi lusadingisisa uma kungelesibotshwa esingcinwe isikhathi esidluliseleyo. KulabeZimbabwe abadlula amakhulu amahlanu (507) abavalelwe emajele kweleBotswana.
Kulabangaphansi kwetshumi abeBotswana abasemajele kweleZimbabwe.
Amazwe womabili asanda kulobelana isivumelwano sokuthi kuvunyelwe abapikayo ukuthi bayeqedisa izigwebo emazweni abo, uma bethanda.
