Amalunga ebandla le-CCC angatshumi amabili lanhlanu agoqela unobhala wenhlelo zebandla lelo, njalo emela i-Mkoba edale lephalamende uMnu. Amos Chibaya abotshiwe ngoMgqibelo.
Amalunga la ebephakathi komhlangano elokutshini le-Budiriro emzini ka Mnu. Machingauta, yena omela lesosigaba edale lephalamende. Kubikwa amapholisa e-Riot afike ahlakaza lumbuthano atshaya lababantu, asebabopha.
Akukacaci ukubana betheswa cala bani okwamanje, kodwa balokhu bebebanjiwe enkambeni yamapholisa eBudiriro, emini, bazosuswa njalo bahanjiswa esitokisini se-Cental Police, enzikini yedolobho le-Harare, lapho abakhangelelwe ukulala khona ngoMgqibelo.
IStudio 7 ixoxe lomsekeli wesikhulumeli sebandla le-CCC uMnu. Gift Ostallos Siziba ngaloludaba.
"Besilomhlangano wethu e-Budiriro;Amapholisa abophe u-Member of Parliament wethu owe-Mkoba, uHonorable Chibaya, lamanye ama-members ethu angu-25, besithi asivunyelwa ukubana siyenze i-meeting. Kodwa esikwaziyo esikuchasisele amapholisa yikubana ke, i-meeting yethu besiyenzela ku-private residence, and siyavunyelwa ukuhlangana ke lama-members ethu ngenxa yokubana le ayisiyo-public meeting." Kutsho uMnu. Siziba.
