Washington DC.............
Igqweta elilwela amalungelo oluntu elisebenza phansi kwenhlanganiso yeZimbabwe Lawyers for Human Rights, umnumzana Kudzai kadzere, ubhaxabulwe wephulwa isandla, ngamapholisa awe Zimbabwe Republic Police, awemzini weBudiriro, oseHarare, Ngesonto.
Lokhu kwenzakale esiya etshayela imotha esiya enkambeni yamapholisa ukuyammela amalunga ebandla eliphikisayo ele Citizens Coalition for Change – CCC, abotshwe emzini munye oweBudiriro, Ngomgqibelo.
Phakathi kwamalunga aweCCC, abotshwe NgoMgqibelo, kuleziphathamandla zebandla ezigoqela, esibona ngokuqoqwa kwenhlelo zebandla, olilunga ledale lephalamende emmele i -Mkoba umnumzana Amos Chibaya lommeli weBudiriro uMnu. Costa Machingauta. Abe CCC laba babotshwe beqhuba umhlangano webandla endlini ka Machingauta.
Umsakazo weStudio 7 awenelisanga ukuthola umpathintambo wogatsha lwendaba zasekhaya uMnu. Kazembe Kazembe ukuze sizwe icele likahulumende ngaloludaba. Kodwa wenelise ukuxoxa legqwetha elimela uKadzere, uNkosikazi Nontokozo Dube-Tachiona laye olilunga lenhlanganiso yeZimbabwe Lawyers for Human Rights, echasisa kabanzi ngokwehlele uKadzere.
