amalinks wokungena

Breaking News

UBulawayo Usungula Uhlelo Lokuthanyela, Ukubutha Izibi Lokulondoloza Idolobho Lihlanzekile


Bulawayo Clean-up Campaign

Abekhansili, yakoBulawayo bathi babutha izibi nsuku zonke enzikini yedolobho ebusuku, kuthi emalokitshini babutha kanye ngeviki. Kodwa izibi ziyanda enzikini yedolobho zibangelwa ngabathengisa impahla okungekho emthethweni

Lamhlanje ikhansili yako Bulawayo imanyene labosomabhizimusi, abewofisi kamphathintambo wako Bulawayo, ugatsha lwezemvelo lokwethekelelwa kwelizwe kunye lohlangothi olwe-Enviromental Management Agency, ukusungula uhlelo lokulondoloza idolobho leli lihlanzekile oluqalele kumgwaqo u-Lobengula Street.

Ekhuluma lomsakazo we-Studio 7, ngesikhathi bebutha izibi, umsekeli ka-Mayor wako Bulawayo, uKhansila Mlandu Ncube uchaze ukuba ababuyeli emuva ngokubuyusela idolobho kuzinga lokuhlala lihlanzekile.

“Luqalile lamhlanje uhlelo lokubutha izibi idolobho lonke njalo sibonga bonke abasiphathise kuloluhlelo ngoba akulula, lobanje zihlala zibuthwa izibi edolobheni.”
Obambele umqondisi wezempilakahle kukhansili yakoBulawayo uMnu. Charles Malaba uchaze ukuba bazathatha insuku ezintathu behlanza idolobho.

“Ukubuthwa kwezibi kuqale kuhle njalo kuyaphela NgolweSihlanu kodwa sizaqhubeka sibutha izibi njengansuku zonke esivele sivame ukukwenza.”
UMabhalane wekhansili yako Bulawayo uNkosikazi Sikhangele Zhou, uphathe ngodaba lohlelo lwabo lokususa abantu abathengisa okungekho emthethweni enzikini yedolobho.

“Uhlelo lwethu lokususa abantu abathengisa okungekho emthethweni alumanga njalo lalaba asebazipha imigwaqo behlale beszi ukuthi siyeza bengaziyengi.”
Umqondisi we-Zimbabwe Tourism Authority koBulawayo, uNkosikazi Novuyo Mathonsi yena uthi bafuma izethekeli zizobuka idolobho elihlanzekileyo.

“Idolobho sifuna libuyele lapho elalikhona sonke esilaziyo ukuthi lalihlanzeke njani, ukuze laloba sinxusa izethekeli sikwenze singelavalo lokuyangeka.”

Umqondisi we-Zimbabwe International Trade Fair uMnu. Nicholas Ndebele lezisebenzi zakhe labo bebekhona bephatheke ekubutheni izibi kuhlelo lwanamhlanje.

“Lathi siyaphatheka lamhlanje kuhlelo lokuhlanza idolobho, ngoba kuhambelana lombukiso wethu. Sifuna osomabhizimusi bezokwenza amabhizimusi abo edolobheni elihlanzekileyo ukuze kubelentuthuko ezweni.”

UNkosikazi Sithembisiwe Ndlovu umqondisi wezokuhlanzeka kwako Bulawayo e-Environmental Management Agency, uthi bakubone kuqakathekile ukubambisana lekhansili.

“Umhlangano esibelawo kuviki edlule njengabo somabhizimusi bakoBulawayo, wenze sabalosuku lolu lokuthi sihlanze idolobho, njalo sizaqhubekela phambili lomkhankaso wethu wokulihlanza nyangazonke. Futhi sikhuthaza abantu ukuba bahlale behlanzekile lapho abasebenzela khona.”

Isikhilumi sekhansili, uNkosazana Bongiwe Ngwenya uchaze ukuba ikhansili ibutha izibi malanga wonke enzikini yedolobho ebusuku. Kuthi emalokitshini babutha kanye ngeviki. Kodwa izibi ziyanda enzikini yedolobho zibangelwa ngabantu abathengisa impahla ezehlukeneyo abangekho emthethweni kuhlanganisa labamabhasi asethwala izihambi enzikini yedolobho. Lokhu abathengisayo bayakuphika bathi ikhansili isikhulelwa yizibi edolobheni.

please wait

No media source currently available

0:00 0:04:29 0:00

Facebook Forum

XS
SM
MD
LG