amalinks wokungena

Breaking News

Bakhala Ngesimo Esibi Semigwaqo Esidinga Ukulungisiswa Kutsha


State of roads

Osomabhizimusi bamankampani ezimota lamabhasi athwala uzulu, bakhala ngokuqonga kwendleko yokulondoloza izimota zabo ukuba zilungele ukuhamba emigwaqweni, ngenxa yokonokala kwemigwaqo yelizwe. Abatshayeli bona bathi, imigwaqo le ibulala izimota, ibuye njalo ingezelele ukwanda kwengozi zemigwaqo.

Bulawayo............

Isimo semigwaqo e-Zimbabwe jikelele sesisibi kakhulu okubangelwa yikungalungiswa, lokulondolozwa kwayo ngemfanelo, osokungezelelwa layikuna kwezulu.

Inengi yalemigwaqo imagodi godi kuthi imphetho yayo igugudekile, eminye njalo mincinyane kakhulu okokuthi imota ezimbili azeneli ukuphambana emgwaqweni, enye yazo ingaphambukanga.

Osomabhizimusi bamankampani ezimota lamabhasi athwala uzulu, bakhala ngokuqonga kwendleko yokulondoloza izimota zabo ukuba zilungele ukuhamba emigwaqweni, ngenxa yokonokala kwemigwaqo yelizwe. Abatshayeli bona bathi, imigwaqo le ibulala izimota, ibuye njalo ingezelele ukwanda kwengozi zemigwaqo.

UMnu. Ambrose Sibindi umgcinisihlalo we-Bulawayo Progressive Residents Association, uthi minengi imigwaqo okumele ilungiswe edolobheni lakoBulawayo.

"Imigwaqo eminengi akuhambeki kulamagodi okokuthi imota ingangena igijima kakhulu kungaba lengozi; okokuthi imota ingawa. So siyananzelela ukuthi ikhansili imemezele ukuthi bazame ukuthi balungisise umgwaqo weLuveve: Sekuqalisa ukusetshezwa. Siyezwa lokuthi uhulumende uthe uzangenisa eyinye imali. Esingakutsho yikuthi imigwaqo vele yonakele: Kungabi yiLuveve kuphela kodwa imigwaqo eminengi ikhangelwe ikakhulu indawo eziqakathekileyo njengezikolo lama-clinics."

UMnu. Gibson Ndlovu otshayela izimota ezithwala uzulu, uthi imigwaqo le isisenza kube nzima, ngoba imota sezimele zihlale zikhangelwe njalo nje, okuba yindleko eyenza kube nzima ukuthi bathole inzuzo efaneleyo.

“Imigwaqo enjengalo, uLuveve Road. yimigwaqo ebhizi okwamagama njalo imele ihlale isebenziseka. Amagodi asegcwele kulumgwaqo abesesenza sihlale njalo nje sikomakanika, okuyinto eqeda imali ngoba uzathi kumele usebenze imali imota ifile, njalo kumele usebenzise imali osanda kuyisebenza. Akuseyikho kusebenza nxa sekunjalo ngoba sesisebenzela ukuthenga amaParts emota labomakanika."

UNkosikazi Sanele Mlalazi, isakhamuzi sakoBulawayo, uthi imigwaqo yonke idinga ukulungiswa edolobheni hayi oweLuveve kuphela.

“ULuveve Road ngumgwaqo o-busy kakhulu; olemota ezinengi, lengozi zibazinengi. Lapho zibangelwa yisimo somgwaqo, siyathaba kakhulu nxa usulungiswa. Lokhu sokungehlisa izingozi kanye lokufelwa zimota zingena kuma-pothole. Amanye angagcwala amanzi awakhanyi kodwa akungalungiswa wona wodwa. Imigwaqo yonke ifile; ifuna ukulungiswa."

Lokhu sekwenze ukuthi uhulumende weZimbabwe kanye logatsha olwe-Zimbabwe National Roads Administration (ZINARA), bafake imali engamabhiliyoni alikhulu lamatshumi amathathu ($130 billion) ukuze ilungise imigwaqo angamakilomitha azinkulungwane ezilitshumi (10 000km).

Loluhlelo lukhangelelwe ukulungisisa imigwaqo emqoka elizweni.

Ngesikhathi esifanayo, ikhansili yakoBulawayo layo yazise ukuba iphakathi kokulungisa umgwaqo weLuveve. Lolu hlelo lukhangelelwe ukuthatha inyanga ezintathu. Njalo kukhangelelwe ukuba kusetshenziswe izigidi zamadola ezingamakhulu ayisikhombisa (ZWL $700 million).

please wait

No media source currently available

0:00 0:03:13 0:00

Facebook Forum

XS
SM
MD
LG