Bakhathazekile abaphikisayo abathi uhulumende kaMongameli Emmerson Mnangagwa ubopha abanye babo mahlayana esenzela ukubhidliza amabandla anjenge Citizens Coalition for Change ekhokhelwa nguMnu. Nelson Chamisa kungakenziwa ukhetho lonyaka. Kodwa abakubandla leZanu PF bathi kubotshwa izigilamkhuba.
UMnu. Gift Ostallos Siziba, umsekeli wesikhulumeli sebandla leCCC, uthi uhulumende kaMnangagwa ubathwalise nzima.
USiziba uthi usephelelwe uhulumende kaMnangagwa, owesaba amabandla aphikisayo.
Lokhu kusekelwa nguMnu. Effie Dlela Ncube, olwela ilungelo loluntu.
UNcube uthi akusoze kuqhutshwe ukhetho olukhululekileyo lonyaka eZimbabwe.
Kodwa uMnu. Freedom Murechu, okubandla leZanu PF, uthi kubotshwa amahlongandlebe kuphela eZimbabwe.
UMurechu uphinde wathi ibandla lakhe likhankasela ukhetho ngokuthula.
Kulamalunga ebandla leCCC abotshwe ngeviki ephelileyo esemhlanganweni eHarare. Kulamanye agoqela uMnu. Job Sikhala abotshwa esetsheswa amacala okutshotshozela udlakela. Abanye babo bavunyelwa ukuhlawula isibambiso sebail. Amalunga ebandla leMthwakazi Republic Party labo bavalelwe entilongweni.