Harare....................
Amagqwetha wommeli weZengeza West edale lephalamende, uMnu Job Sikhala athi icala lakhe lokutshotshozela udlakela alikhanyi ngoba umfakazi kudaba lolu wenza okukucabangela nje, engela bufakazi obugcweleyo.
Lokhu kuphume emthethwandaba ka Mantshi lapho umqondisi wogatsha lwamapholisa olwe Law and Order, eHarare, uMnu Edmore Runganga ube eze ukuzofakaza ngodaba lolu.
USikhala wetheswa icala lokutshotshozela udlakela ngemva kokutshengisela okwenzakala ngo Ntulikazi 2020, abatshutshisi besithi wayefuna kube lokunye ukutshengisela. Abatshutshisi banikeze idale umfanekiso we video lapho uSikhala akhanya khona esendaweni engathi liganga ekhuthaza ukuba abantu batshengisele.
URunganga ebuzisiswa ngamagqwetha ngodaba lolu uthe ulobufakazi bokuba uSikhala waye tshotshozela udlakela ngoba uyamazi njengo muntu othanda udlakela.
Idale liphinde laphiwa iaudio eyenziwa phakathi kwentathelizindaba uSimba Chikanza owe Zimeye lo Sikhala lapho ayekhuthaza uzulu we Zimbabwe ukuba atshengisele.
Ebuzisiswa ngamagqwetha ka Sikhala ukuba icala leli lenzakala ngaphi, uRunganga wehlulekile ukutsho, amagqwetha esithi lokhu kutshengisa ukuba kenelisi ukwenza umsebenzi wakhe.
Ekhuluma le ntathelizindaba omunye walabo abamela uSikhala kudaba lolu uMnu. Jeremiah Bamu uthi akula bufakazi kulokho okutshiwo ngamapholisa.
“Siqhubekeli ngodaba loka Sikhala, lapho etheswa khona ukutshotshozela udlakela ngo 2020. UOfficer Commanding Law and Order owe CID uphe ubufakazi”
UBamu uqhubeke esithi kusobala ukuba abatshutshise sebephonguphandaphanda lapha lalaphaya befuna udaba lolu luqhubeke kodwa kungela bufakazi obuchachileyo becala elenziwa ngu Sikhala.
“Siyakhala ukuba abatshutshisi abalandaba lodubo. Besithe udaba lolu besithe luzaqhubeka emini sebesithi baphatheke ngokunye. Abatshutshisi sebesithi balokunye abafuna ukukwenza emini”
Umsekeli wesikhulumeli sebandla le CCC uMnu Mafa uthi uSikhala uyahlukunyezwa.
“Laba abaphula umthetho izandla zabo zizabalandela. Sibuhlungu sifuna uSikhala abe lemuli yakhe njengo muntu wonke ose Zimbabwe”
Udaba luka Sikhala luzaphenduka ngo Mvulo kuviki ezayo ngemva kokuba umutshitshi uNkosikazi Tendai Shonhai etshele uMatshi uNkosikaz Vongai Muchuchuti Guvuriro ukuba kenelisi ukuqhubeka ngodaba lolu kusasa lango Lwesihlanu.