UMongameli Emmerson Mnangagwa utshele umbuthano wamazwe ezwekazi leAfrica owe-Feed Africa 2 Summit eDakar kwele Senegal ngoLwesithathu ukuthi uhulumende wenza konke okusemandleni akhe ukubona ukuthi ilizwe liyazimela endabeni zokudla.
UMnangagwa uthe wenza lokhu phansi kwenhlelo zokulima ukudla okugoqela ingqoloyi kanye lomumbu.
UMnangagwa uphinde wathi ngenxa yokuguquka komkhathi, uhulumende sowaqala ukuzilimela kunhlelo zokuthelezela – ama-irrigation schemes, ukuze ilizwe lenelise ukuthola amathani edlula izigidi ezimbili zengqoloyi lamanye njalo afanayo awomumbu ngomnyaka.
Uthe ukuthenga umvundiso kanye lokudla eRussia leUkraine, kwaphazanyiswa yimpi phakathi kwamazwe lawo womabili, osokwenza ukuthi iZimbabwe ivuke izenzele.
Umbuthano lo uhamba ngaphansi kwesihloko esithi: “Feeding Africa: Food Security and Resilience."
UMnu. Masimba Kuchera, ingcwethi kwezenotho, uthi kuyamangalisa okukhulunywa nguMnangagwa.
"Uhulumende uyasithembisa ukuthi ukudla kukhona lapha e-Zimbabwe. Nxa abe-GMB bekhuluma, bathi bona balomumbu okwanisa ukuthi abantu badle lapha eZimbabwe ngomnyaka ka2023; njalo amagrains anjenge wheat akhona. Udubo esilalo yikuthi akulandlela eyokudingisisa lokhu kumbe sibone ukuthi lingaba liqiniso yini okukhulunywa nguhulumende.
UKachera uthe okunye okuhluphayo yinkohlakalo eGrain Marketing Board lapho okuthengwa kuthengiswa umumbu ngentengo ephazulu.