amalinks wokungena

Breaking News

Usegqibe Uhambo Lokwethekelela eSouth Africa u-U.S. Secretary Janet Yellen


U.S. Treasury Secretary Janet Yellen
U.S. Treasury Secretary Janet Yellen

Kuhambo lwakhe lokuyasebenza amalanga amathathu kweleSouth Africa umphathintambo Yellen ungene imihlangano lazo zonke inhlangothi zomnotho ikakhulu lapho eleSouth Africa elibhekane khona lenhlupho.

Joahhanesburg............

Umphathintambo wogatsha lwezemali kweleMelika uNkosikazi Janet Yellen uselugqibile uhambo lwakhe lokwethekelela eleSouth Africa lapho aqhube imihlangano ehlukeneyo leziphathamandla zalelo lizwe, ezigoqela uMongameli Cyril Ramaphosa labasomabhizimusi.

Kuhambo lwakhe lokuyasebenza amalanga amathathu kweleSouth Africa umphathintambo Yellen ungene imihlangano lazo zonke inhlangothi zomnotho ikakhulu lapho eleSouth Africa elibhekane khona lenhlupho.

Umhlangano awuqhube lomphathintambo wogatsha lwezemali kweleSouth Africa umnumnzana Enock Godongwana yiwo osunconywe zingcitshi njengoba usenzeka ngesikhathi umnotho wakweleSouth Africa ubhekane lobunzima obukhulu.

“IMelika iyabuqakathekisa kakhulu ubudlelwano bayo leSouth Africa njengoba lisazi ukusebenzelana kwethu ekutholeni Amandla kagetsi.

Ubudlelwano beSouth Africa leMelika buphinde bangconywa kakhulu ngumphathintambo wezemali kweleSouth Africa umnumnzana Enock Godongwana yena othe bafuna buqhubeke bubuhle bunjalo.

“Siyathokoza kakhulu ngokwethekela kweMelika njengoba sisebenzisana endaweni ezifana leG20 lakwezemali.”

Lobanje intatheli zingavunyelwanga ukungena emhlanganweni oqhutshwe ngumphathintambo Yellen lomongameli Ramaphosa, umeli weMelika kweleSouth Africa umnumnzana Reuben Brigety uthi ababili laba bakhulume kabanzi ngodaba lokusilela kwamagetsi kweleSouth Africa.

“Kuphunyelwene egcekeni ngokuthi umhlahlandlela yikugaya amagetsi angelangozi emkhathini, kwasala kuphela ukuthi kubunjwe indlela zokuthi lokho kwenziwe njani.”

Isivumelwano sokusebenzisana ekulwiseni ukubulawa kwenyamazana zendle kweleSouth Africa, laso sesingconywe zingcitshi njengento ezasiza kakhulu kuloluhlupho olubhekane leSouth Africa.

Ngasikhathi abanye bathi ukwethekela kwakhe kunkampani yeMelika iFord Motor Company kuphe ubufakazi bokuthi liqinisile eleMelika nxa lisithi lifuna ukudlelana leSouth Afriica kwezomnotho.

Kodwake ingcitshi kwezombusazwe umnumnzana Frank Lekaba uthi lobanje bevumelene kokunengi akukho okutheni ububona ngaso linye kudaba lwempi yeUkraine njengoba iSouth Africa ilokhu ingavumelani leMelika ekuthini iRussia kufanele ibanjwe ngamandla ukukhipha amasotsha ayo kweleUkraine.

“Umphathintambo wogatsha lwezobudlelwano beSouth Africa lamanye amazwe wakubeka kwacaca ukuthi akekho ongabatshela ukuthi banzeni ngaloludaba.”

Kusenjalo inengi lezizalwane zakweleSouth Africa lithi selilinde ukubona ukugcwaliswa kwezivumelwano ezenziweyo ukuze kukhandwe amathuba emisebenzi lokuqeda ubuyanga asobobhahile elizweni.

please wait

No media source currently available

0:00 0:03:13 0:00
XS
SM
MD
LG