Washington DC.........................
Umbiko owethulwe ngabenhlanganiso ye-Transparency International woluhlu lwamazwe akhokhelayo kwezenkohlakalo, owe-Corruption Perceptions Index – CPI , owomnyaka ka-2022, uveza ukuba ele-Zimbabwe likusibanga esiphezulu kokulikhulu lengxenye - 157, emazweni aphose afike kumakhulu amabili -180 alenkohlakalo eyedlulisa amalawulo.
Amazwe ayisilinganiso phose esingamatshumi ayisikhombisa ekhulwini – 66.6% athole impumela engaphansi kwamatshumi amahlanu – 50, agoqela ele-Zimbabwe.
Lanxa kulamazwe azamileyo ukuphuma kulesosigaba esibi, amanengi ehlulekile ukuqansa ukungena kwesingcono. Kwele-Zimbabwe, inkohlakalo iqhubekela phambili, njalo ubungcono kabukhanyi.
Ukuhlaziya loludaba, sixoxe loMnu. Useni Sibanda umqondisi wenhlanganiso ye-Zimbabwe Christian Alliance.
“Ilizwe lakithi lifumanwe liku-157 phakathi kwamazwe angu-180, ngodaba lolu olwenkohlakalo. Udubo esilalo lapha okwakuqala, yikuhawula kwabantu; abantu abanengi bayadubeka. Okwesibili, sokwangena umkhuba owokuthi abantu bafuna ukunotha masinya. Umuntu uyabe engafuni ukusebenzela imali, kodwa efuna ukuba lemali enengi ngesikhathi esifitshane. Lokhu kuyayenza ukuthi ke umuntu abesedinga ezinye indlela ezingaqondanga ukuze leyo mali ibekhona.” Kutsho uMnu. Sibanda.
