Lanxa abanye abeZimbabwe abahlala kwamanye amazwe benelise ukupha imbono yabo phezu kokuguqulwa komthetho ophathelane lokuvota izolo, abanye bathi bebengakwazi ukuthi kulohlelo olunjalo olwenzakalayo.
Ikomidi yephalamende ebona ngezemithetho ibimemezele kuthange ukuthi ibizakhulumisana lezizalwane zeZimbabwe eziphadle kwelizwe izolo ukuze izwe imbono yazo ngokuguqulwa kweElectoral Amendment Bill, isebenzisa umabonakude weZoom.
Abanengi abapha imbono yabo izolo bathe bafuna izizalwane zeZimbabwe eziphandle kwelizwe zivunyelwe ukuvota zikulawo mazwe, i-diaspora vote.
Kodwa umkhokheli wenhlanganiso yeZimbabwe Diaspora Vote Campaign, yona ekhankasela okufanayo iseMelika, uMnu Den Moyo uthi behlulekile ukupha imbono yabo ngoba bebengakwazi ukuthi kuqhutshwa uhlelo lolu izolo.
