MARYLAND - UMongameli Aleksandr Lukashenko, obekwele Zimbabwe okwensuku ezintathu, utshiye evezele ilizwe amathilakitha, ama-combine harvesters lokunye okungaziwayo ukuba kuzathathswa ngubani.
Uhulumende uthi konke lokhu kuphansi kohlelo olulesikhathi lwasungulwa eZimbabwe olokuthola imitshina yokulima kwele Belarus.
Amalunga ebandla elibusayo ayaluncoma uhlelo lolu kuthi abaphikisayo bathi akumelanga uLukashenko edlelane loMnangagwa ngoba bathi wephula ilungelo loluntu.
Bathi akuqedakali ukuba amathilakitha la lokunye kuzanikwa bani loba kusobala ukuthi abasekela ibandla eliphikisayo bazawathola ensitha.
Kwake kwaqhutshwa inhlelo ezifanayo eZimbabwe ibhanga leZimbabwe liphansi kuka Mnu. Gideon Gono. Uzulu wacina ehlawula imali enengi okumangalisayo ukuze kubhadalwe imitshina yokulima eyathathwa kwele China.
Okwenziwe nguLukashenko kuzafana lalokhu na njalo azakwenziwani amathilakitha, ama-combine harvesters lokunye.
UMnu. Joseph Tshuma, ilunga leZanu PF, uthi uhlelo lolu ngolomuntu wonke eZimbabwe kodwa uMnu. Den Moyo, olandela ezombusazwe ekwele Melika, uzyakuphikisa lokhu.