HARARE - Kulabanye abantu ababambe owangaphansi labanye abathi kuqondile okwenziwe lidale leSenate elivumelane ukuba iPrivate Voluntary Organizations Amendement Bill ibengumthetho opheleleyo.
Abethuswe ngokwenziwe lidale leSenate bathi zinengi inhlanganiso ezizimeleyo ezilakho ukuvalwa uma uMongameli Emmerson Mnangagwa engavuma laye ukuthi iPVO Amendment Bill ibe ngumthetho welizwe.
Kukhangelelwe ukuba uMnangagwa uzakuvuma lokhu.
Abaphikisana lalokhu bathi leli lihlazo ngoba abantu bakwele Zimbabwe bazancindezelwa okumangalisayo nguhulumende kaMnangagwa onguntando kayiphikiswa.
UMnu. Gift Ostallos Siziba, umsekeli wesikhulumeli sebandla leCitizens Coalition for Change (CCC), uthi bazathwala nzima abantu eZimbabwe ngomthetho omutsha lo.
“Lokhu kutshengisa ukuba sebefuna ukuba lebandla elilodwa. Sebekwenze kwaba semthethweni lokhu.IZANU PF yiyo yodwa esivunyelwa ukuhlangana bephazamisa uzulu.”
Lokhu kusekelwe ngummeli weHwange edale lephalamende uMnu Daniel Molokele.
“Ungumthetho omutsha engingawuthakazeleli ngoba uzakwenza ukuba amaNGO athwale nzima ekusebenzeni ezigabeni ezitshiyaneyo elizweni.”
UMolokele uqhubeke esithi akumelanga uMnangagwa apasise iBill le.
“Uhulumende uzasebenzisa kubi umthetho lowu. Ungumthetho ozabisela iZimbabwe emuva kakhulu yikho siwuphikisa sisithu mubi kakhulu.”
UMnu. Munashe Mtutsa, okudale leCentral Committee kubandla leZanu PF, uthi bazanqoba kukhetho kungenani lomthetho omutsha lo,
“Thina sizanqoba ngoba ibandla lethu lisebantwini njalo kakulani lemthetho. Imithetho yenziwa ephalamende hatshi kubandla lethu.”
I-United States Agency for International Development (USAid) ithi lumthetho uzaphazamisa umsebenzi wabo.
Inhlanganiso leyi isinikeze uzulu weZimbabwe imali efika US$4,5 billion kusukela ngomnyaka ka 1980.
Lokhu kusekelwe yinhlanganiso yeZimbabwe Human Rights NGO Forum ethi umthetho lo ulakho ukwenza ukuba ilizwe liswele imali efika iUS$1 billion ngomnyaka.
Umthetho lo uzanikeza uhulumende amandla okuba avale inhlanganiso acabangela ukuba zifuna ukwenza umsebenzi ongahambelani lalokho ezekumelayo.