Amalunga enhlanganiso ezimela amalungelo abesifazane, bezibuthene izolo edolobheni le-Harare, kucubungulwa ukuphatheka kwabesifazane kwezombusazwe.
Indikimba yalumhlangano ibisithi – Women’s Political Participation.
Kuphume ukubana kufanele kubunjwe umthetho owokulinganisa amathuba phakathi kwabesifazane labesilisa, kumbe i-Gender Act, njengokulotshwe kusisekelo sombuso.
Amalunga abekulo mhlangano avumelene ukuba umthetho lo ungasiza kakhulu ekuphakamiseni abesifazane ukuba labo baphatheke ngokugcweleyo kwezombusazwe.
Abesifazane abaphuma kumabandla atshiyeneyo, kanye labenhlanganiso ezizimeleyo bebebuthene e-Harare izolo, lapho abamabandla ezombusazwe abafake izicelo zabo kugwalo lokuzinikela ukugcwalisisa udaba lokulinganisa amathuba phakathi kwabesifazane labesilisa.
Umqondisi wenhlanganiso eye-Women in Politics Support Unit, uNkosikazi Sakhile Sifelani-Ngoma, uthe umhlangano lo uqakatheke kakhulu, njalo kufanele uhulumende angenele ukubona ukuthi lumthetho uyabunjwe ngoba ukulinganisa amathuba phakathi kwabesifazane labesilisa sokuthethe isikhathi.
Omela i-Matabeleland North edale lephalamende ongowebandla le-MDC-T, UNkosikazi Lwazi Sibanda, uthi laye uvumelana lokubunjwa komthetho, oyiwo ozabona ukuthi abesifazane kabancindezelwa ikakhulu abaphatheka kwezombusazwe.
Umpathintambo wogatsha olubona ngabesifazane kanye lamabhizimisi amancane, uNkosikazi Sithembiso Nyoni ugcizelele lowombono esithi isisekelo sombuso sicacile nxa kukhulunywa ngokulinganiswa kwamathuba abesifazane labesilisa, kodwa udubo olukhona ngolokuthi amabandla yiwo angasilandeliyo.
Owake waba ngumgcinisihlalo sogatsha lwabomama kubandla le-ZAPU, osengowebandla le-ZANU-PF, uNkosikazi Getrude Makhwila, yena uthe lanxa abesifazane bebanengi okwedlula abesilisa, ngesikhathi sokhetho kumabandla, abesifazane kabasekelani. Uthe aluba bengasekelana, bengathola amathuba okukhokela alingana labesilisa.
Amabandla ezombusazwe lawo alobise imbono yawo kusivumelawano esokuthi azaphakamisa lokusekela abesifazane, lokubapha amathuba alingana labesilisa kumcintiswano wezihlalo ngesikhathi sikhangelana lokhetho oluzayo lonyaka.
