Ibandla elibusayo ele-ZANU-PF ngioMgqibelo, lemukele abantu okubikwa bephume kumabandla atshiyeneyo, agoqela ele-MDC-T, ZAPU kanye lele-CCC.
Umqondisi webandla leZANU uMnu. Tafadzwa Mugwadi utshele iStudio 7, ukuba inani labantu elibuyele kubandla labo lifika inkulungwane ezinhlanu – 5,000.
UMugwadi uthe bayajabula kakhulu ngokuphenduka kwabantu laba kubandla eliyilo elikhulu kumabandla wonke awezombusazwe kwele Zimbabwe, liyilo njalo ibandla elaletha inkululeko elizweni.
UMugwadi uthe bonke lababantu baphendukele impumelelo abayibona kubandla leZANU-PF kanye lelizweni.
UMnu. Joseph Tshuma, ilunga leCentral Committee kubandla leZANU-PF., uthi abahlamukela amabandla aphikisayo bayamukelwe ngenjabulo libandla elibusayo.
"Sibonile uMongameli wethu, ubaba uMnangagwa esamukela amadodana lamadodakazi olahleko amanengi, ayephumile aya emabandleni atshiyetshiyeneyo. Kodwa basebekubona kufanele ukubana baphenduke ekhaya: Ikhaya lina kuyi-ZANU-PF, elibutha wonke umuntu okwana khona esikhamweni se-ZAU-PF azihlalele, achume." Kutsho uTshuma.
Siphinde saxoxa loMnu. Msongelwa Ndlovu, othi sikhulumeli sebandla leZAPU, uMnu. Msongelwa Ndlovu ngaloludaba.
"Osokwenza (uMnangagwa) ke yikuthi babe lendlela ezokuthi batshengiselel engathi abantu bayayithanda i-party yabo. Bona inhloso yabo kuyikubhidlisza amanye amabandla, beyenza i-one party-state, abayenza belo-Mugabe. Kuphendula uNdlovu.