Udaba lokuthi uMongameli Mnangagwa wepula isisekelo sombuso ngokungasayini ugwalo lwezabelo zokuvota, idelimitation, luqhubekela phambili.
UMnangagwa wayemele asayine lolugwalo ngoLwesihlanu ngoba yikho okwasekwenele amalanga alitshumi lane, okufunwa ngumthetho wezokhetho andubana ahlele amalanga okhetho.
Nxa engakwenzanga lokhu umthetho uyabe usephuliwe.
Kodwa isikhulumeli sikamnangagwa, uMnu. George Charamba, eloba enkundleni yokuxhumana, eye Twitter, uthe ugwalo olwanikezwa uMnangagwa ngumgciniisihlalo wekhomisheni yezokhetho eye ZEC, uNkosikazi Priscilla Chigumba, aluphephelelanga okutsho ukuthi elokhu elesikhathi sokusayina lolugwalo.
UMnangagwa, ophednuke elizweni izolo, wasuka ngelanga okwakumele asayine khona lolugwalo waya kwele Ethiopia emhlanganweni we Africana Union.
Sixoxe lomkhokheli webandla eliphikisayo ele EFF Zimbabwe, uMnu. Innocent Ndibali ukuze sizwe imbono yakhe ngaloludaba.
