HARARE.................
Minyaka yonke mhlaka 21 Nhlolanja, ilizwe linanza ilanga labatsha, ele Robert Mugabe National Youth Day, kodwa kusuka kube lemibono ehlukeneyo ngokuthakazalelwa kwalo.
Abanye bathi leli langa liqakathekile ngoba liyisibonelo esihle sokuthi uhulumende uyakwazi ukuqakatheka kwabatsha kuntuthuko yelizwe.
Kube labanye abathi akukho okokuthakazelela ngoba abasakhulayo behawula, njalo ilanga leli ngelokuvala ukwehluleka kukahulumende ukutholisa intsha amathuba okuziphilisa.
UNkosazana Ntombizodwa Masango, owenhlanganiso esebenza labasakhulayo eye Zimbabwe Youth Arise, yena uncoma okwenziwa nguhulumende ukuqakathekisa leli langa.
“AmaOpportunities kwabasakhulayo akhona, ngoba sanikwa ithuba lokugebha amaMinerals, lukundaba zombusazwe silawo amathuba. Ukuvula amabhizimusi lokuthola umhlabathi wokulima, wonke ngamathuba esawatholayo. Okusalayo yikuthi inqgondo zabancane zivuleke ukuthi babone amathuba akhona.”
Kodwa uNkosazana Senzeni Maphosa, enye yenkokheli zabasakhulayo kubandla leCitizens Coalition for Change (CCC), uphambana lalumnqondo.
“Kusegcekeni ukuthi abakhokheli beZimbabwe sebeyenze ikusasa yabantu abatsha yaphela, kabasela kusasa, kanye leyabantwababo. Abantu abatsha sebetholakala besenza imisebenzi engaqedakaliyo, kungenani lokuthi ufundile. Sithole abesifazana sebethengisa imizimba ezitaladini, kuthi abafana batshona besetshwaleni lasezidhakamizweni ukuze bakhohlwe indubo ababhekane lazo ezenza bengabi lekusasa. Uhulumende okhona akalalo elinye iqhinga elokuthi assize abatsha, nhaphandle kokuthembisa amanga.”
Omunye wabasakhulayo webandla lZanu PF, njalo engumeli weSeke Chikomba edale lephalamende, uNkosazana Tatenda Mavetera, uthi ilanga leli ngelikuthakazalela intuthuko eyalethwa kwabatsha ngumuyi umnumzana Robert Mugabe.
“Khathesi sesenelisa ukuthola izimali zezikweledi ngemali ephansi ngoba kule bhanga labatsha eleEmpowerbank. Senelisa njalo ukuthola umhlabathi njengabatsha, kanye lokungena kwezamabhizimusi, lokhu okwakusaziwa kuyinto yabantu abakhulileyo. Singakhohlwa ukuthi kulezihlalo ezilitshumi ezabatsha kudale lephalamende. Inhlupho zingaba khona kasiyali, kodwa amathuba akhona lawo.”
Enye njalo inkokheli yeCCC, uMnu. Pashor Sibanda, uthi ukubekwa kwelanga le National Youth Day akaboni ubuhle bokuthakazelelwa kwempilo kaMnu. Mugabe.
“Mina njengenkokheli yabontanga kangisuthiseki ngalo ngoba ilanga leli labekwa ukuthi kuhlonitshwe umuntu owasigqilaza kanzima kakhulukazi njengabantu beZimbabwe, kakhulu thina ontanga. Esakutshiyelwayo nguMugabe akula; ngoba akula misebenzi, imigwaqo kayisebenzi, umkhonomi ufile njalo abatsha bayahawula. Kumi manzonzo.”
Umsekeli womqondisi obona ngenhlelo zabatsha kugatsha lwabasakhulayo, umnumzana uMnu. Ophas Dube, uthi uhulumende ule nhlelo ezinengi ezijonge ukuthuthukisa abasakhulayo kungakhathalekile ukuthi ngabebandla liphi lezombusazwe.
“Labo abathi leli langa selitshintshwe laba ngelepolitiki, ayisikho lokhu. Ukunxuswa kukamongameli ukuthi abe ngumhlonitshwa omkhulu ayisikho ukuthi sesingena kwezepolitiki. Kuyaziwa njalo ukuthi uma umongameli ekhona, bonke abantu bayanxuswa, kungenani lokuthi ngebabandla elibusayo kumbe eiphikisayo.”
Umkhosi omkhulu wokuthakazalela iRobert Mugabe National Youth Day, lonyaka wenzelwe ekolitshini leLupane State University, ukhokhelwa nguMongameli Emmerson Mnangagwa.
