HARARE - UMnu. Joachim Chissano, owayengumongameli wakwele Mozambique, uthi kumele eleZimbabwe liqhube ukhetho olukhululekileyo ukuze kuvuselelwe umnotho welizwe ngemfamelo.
UChisano wethule amazwi la ngoLwezine emhlanganweni omkhulu obuhlolisisa indlela eleZimbabwe elingahlawula ngayo izikwelede ezifika amabhiliyoni alitshumi lasithupha – US$16 billion ezenhlanganiso ezigoqela iParis Club, International Monetary Fund, World Bank lezinye.
Uphinde wathi kuqakatheke kakhulu ukuba uhulumende kaMongameli Emmerson Mnangagwa ehloniphe ilungelo loluntu.
Lokhu kusekelwe nguMnu. Akinwumi Adesina, umkhokheli webhanga leAfrican Development Bank, othe eleZimbabwe kumele lilandele okwethulwa yiKgalame Motlante Commission kulandela ukudutshulwa kwabantu abambalwa kusanda kuqhutshwa ukhetho ngomnyaka ka2018 eHarare.
Ikhomishini le yathi kumele kuhlawulwe izihlobo zababulawa ngabezomvikela njalo labafelwa ngabazali lezinye izihlobo ngesikhathi sombhuqazwe weGukurahundi.
UChissano uthe ukungahlonitshwa kwamalungelo kazulu kwenza kube nzima ukuba amazwe afuna ukuncedisa eleZimbabwe ukubhadala izikwelede zalo alithembe ngoba engelaqiniso ukuba lokho okutshiyo yinkokheli yakuleli liqiniso loba hatshi.
Uthe, “Kumele abantu bavunyelwe ukukhetha inkokheli yabo. Akumelanga basetshenziswe ukwenza udlakela okungenza ukuba ukhetho kuleli lube ngongakhululekanga.”
UAdesina ugcizelele esithi loba nje belesifiso sokuncedisana lele Zimbabwe ukuqeda isikwelede salo, kumele lilungise indaba zamalungelo abantu.
“Ukhetho olukhululekileyo luzakwenza ukuba kubelula ukulungisa indaba zesikwelede sele Zimbabwe.”
UMongameli Emmerson Mnangagwa uthembise lumhlangano ukuba uzakwenza konke okusemandleni akhe ukulungisisa amaphutha akhe ukuze enelise ukubhadala izikhwelede ilizwe lakhe elibhekane lazo.
“Sizimisele ukulandela umthetho lokwenza konke okuhle. Sizakwenza ukuba umthetho wethu awusekeli muntu. Sizakwenza ukhetho olukhululekileyo.”
Ingcwethi ecubungula ezombusazwe esebenza lenhlanganiso yeZimbabwe Democracy Institute, uMnu. Bekezela Gumbo, uthi kumele uMnangagwa ahloniphe amacebo awanikwayo kulumhlangano.
“Kuqakathekile ukuba uMnangagwa azi ukuba abantu bafuna ukukhetha inkokheli yabo bengatshelwa. Lokhu kuzancedisa ekuvuseleleni umnotho welizwe.”
Lokhu kusekelwe yisikhulumeli sebandla le MDC-T, uMnu Witness Dube.
“Siyavumelana lakho lokhu ukuba kumele sifunde ku Motlante commission, lokhu kuwela endlebeno ezilukhuni ezeZANU PF ngoba umkhokheli wabo kenzi lokhu abakwenzayo”
Umhlangano oqoqwe ngabe African Development Bank uveze ukuba uhulumende weZimbabwe kathembakali ngoba esehluleka ukulandela izivumelwano ayabe ezezinzile. Banikeze umzekeliso wokuba uhulumende wathembisa ukubhadala izikwelede zabalimi abamhlophe abathathelwa umhlabathi kodwa lanamhlanje akulalutho olwenziwayo.
Ibhanga leli lithembise ukuncedisa eleZimbabwe ukubhadala izikwelede zenhlanganiso ezigoqela oParis Club, World Bank, IMF lezinye.