WASHINGTON - Ibandla leCitizens Coalition for Change, elikhokhelwa nguMnu. Nelson Chamisa, lithi selikhankasela ukhetho oluzayo loba kukhanya engani akuhlelwanga kahle ukudwetshwa kwemingceele yokuvota yikhomishini yeZimbabwe Electoral Commission kanye lohulumende kaMongameli Emmerson Mnangagwa.
Ibandla elibusayo lithi selilungisa ingatsha zalo emadolobheni lemaphandleni njalo lalo seliqalile ukukhankasela ukhetho oluzayo.
UNkosazana Fadzayi Mahere, ophethe uhlangothi lokwethulwa kwemibiko kubandla leCCC, uthi kusobala ukuba iZimbabwe Electoral Commission loMongameli Mnangagwa, badweba imingcele okungekho emthwethweni.
Uthi loba kunjalo, sebeqalile ukukhankasela ukhetho oluzakwenziwa lonyaka. UMnu. Kucaca Phulu, omele iNkulumane edale lephalamende, uthi akukabi kulakho ukuqhamuka kodlakela ngesikhathi sokhetho.
UPhulu, okubadla leCCC, uthi okwamanje amapholisa abathwalise nzima
Omunye okubandla leli okhala ngokwenziwa ngamapholisa nguMnu. Thembelani Moyo, ohlala eLupane.
Uthi akumelanga amapholisa evimbe imihlangano yabo.
Isikhulumeli sebandla leZanu PF, uMnu. Chris Mutsvangwa, uthi sebelungisa izigaba zabo ukwenzela ukuba abantu bevote kahle kukhetho oluzayo.
UMnu. Malaki Nkomo, okubandla leli, ugcizelela esithi bafisa ukuba abantu abanengi bevotele uMnangagwa.
Uthi abantu bathakazelela kakhulu ibandla leZanu PF endaweni ezinengi.
UMnu. Munashe Mututsa uyakusekela lokhu esithi ibandla elibusayo libambisana lozulu.
Olwela ilungelo likazulu, uMnu. Effie Dlela Ncube, uthi ibandla leZanu PF linkankasela ukhetho oluzayo santando.
EleZimbabwe lizaqhubha ukhetho lokudinga umongameli, abameli beadle lephalamende leSenate kanye lamakhansila.