HARARE - Umsekeli kanobhala obona ngezobudlelwano beMelika lamazwe awezwekazi le-Africa, uMnu. Robert Scott, ufike eZimbabwe ngoLwesithathu, kuhambo lokwethekelela leli lizwe okwensuku ezine.
Ekhuluma lentathelizindaba ekufikeni kwakhe uScott wazise ukuba uze eZimbabwe ukuzokhulumisana labenhlangothi zonke; ukuzwa ukuba eleZimbabwe liba lokhetho olukhululekileyo. Uthe uzaba lemihlangano leziphathamandla zikahulumende, inhlanganiso ezizimeleyo, lamabandla ezombusazwe aphikisayo kanye lelibusayo.
“Ngiyathaba ukuba lapha. Ngilapha ukuzekhuluma lohulumende lenhlanganiso ezizimeleyo, ukuba sikhulume ngokuthi kube lokukhuluma okulokuthula elizweni.”
Kodwa ingcitshi kwezombusazwe uMnu. Pride Mkono uthi kathembi ukuba uhulumende kaMongameli Emmerson Mnangagwa ulakho ukuguqula indlela aqhuba ngayo ukhetho.
“Kusobala ukuba ukwenza kuka hulumende kakutshengisi ukuba uzimisele ukwamukela lokuguqula izenzo zakhe. Ukuza kuka Scott kuqakathekile kodwa kunzima ukuba uhulumende lo aguqule izenzo zakhe”
Omunye osekela ibandla le-ZANU PF, uMnu. Munashe Mtutsa, uthi uhulumende uzimisele ukulondoloza amalungelo kazulu.
“Njenge bandla leZANU PF, siyazi ukuba kulabantu abakhuluma okunengi; kodwa sizimisele ukuba kube lamalungelo oluntu njengalokho okukhona. Kusobala ukuba uhulumende we-ZANU PF uzimisele”
Isikhulumeli sogatsha lwezobudlelwano beZimbabwe lamanye amazwe omhlaba uMnu. Livit Mugejo, utshele iStudio 7 ukuthi, ukwethekelela kuka Scott elizweni kuqakathekile kakhulu, njalo kuphansi kwemizamo kahulumende yokulungisisa ubudlelwano lele-Melika.
Uthi limizamo yavela yaqalisela emhlanganweni, oweU.S- Africa Leaders’ Summit oqhutshwe ngele-Melika ngoMpalakazi nyakenye.
UMongameli Mnangagwa owetheswa izijeziso zenotho ngele Melika, kanxuswanga. Kodwa wayemelwe ngumpathintambo wezokubudlelwano belizwe lamanye amazwe, uMnu. Frederick Shava.
UScott ukhangelelwe ukukhuluma ngamanyathelo okumele athathwe ukugcwalisa iziqondiso ezavunyelanwa emhlanganweni owe US-Africa Leader’s Summit, kanye lokuthi eleZimbabwe lingancedwa ngayiphi indlela ukulungisisa udubo lwesikwelede salo kwamanye amazwe, kanye lakunhlanganiso zamabhanga omhlaba esama-billion amadola esilokhu sikhula njalo lingenelisi ukusibhadala.
Edabeni lokwaliswa kwentathelizindaba zeStudio 7, leye-NewsDay ukuthapha izindaba esilindweni sendizamtshina ese-Robert Mugabe International Airport, eHarare, uMugejo uxolisile ngokwenzakale lapho. Akulazizatho esicacileyo esiphiwe nguhulumende, esokwalisa intathelizindaba yeStudio 7 uRutendo Mawere lowephephandaba leNewsDay uPriviledge Gumbodete, kodwa kuvunyelwa zonke intathelizindaba ebe zikhona ukungena.
Umholi wenhlanganiso emela intathelizindaba eye-Voluntary Media Council of Zimbabwe, uMnu Loughty Dube, uthi kusobala ukuba uhulumende kahloniphi amalungelo oluntu.
“Ngokubona kwethu, kusobala ukuthi uhulumende wakuleli uqhubeka phambili esehluleka ukuhlonipha intathelizindaba”
Kukwethekelela kwakhe kwele Zimbabwe, uScott ukhangelelwe ukuqhuba imihlangano lenhlangothi ezithile zikazulu, ngendaba ezehlukeneyo, ezigoqela amalungelo oluntu, izijeziso zomnotho lokuthengiselana phakathi kwele Melika lele-Zimbabwe