HARARE - Iqula lakwele Russia elethekelela eZimbabwe lithi lithakazelela ukutshala imali kuhlelo lokulungiswa kwensimbi eNkabazwe lakwezinye inhlangothi zomnotho kulandela umhlangano walo leziphathamandla zengatsha ezehlukeneyo zikahulumende.
Ukwethekelela kwequla leRussia kuza ngesikhathi lelo lizwe libikwa selidinga abangane bokuthengiselana labo ngemva kokuxabana lamazwe angentshonalanga phezu kodaba lwempi yaseKremlin kanye leye Ukraine.
UMnu. Vyacheslav Yarin, obekhuluma ngolimi lwaseRussia etolikelwa ngeSiNgisi, ulandise kabanzi phezu kwenhlangothi zezomnotho lapho ilizwe lakhe elibona lingasebenzisana lele Zimbabwe.
“Sikulungele njalo ukukhulisa ubudlelwano bethu ehlangothini lwezemfundo yaphezulu oluzoqeqesha abasebenzi abaqeqesheke kakhulu.”
UMavis Sibanda, unobhala wogatsha lwamafekitali lokulungiswa kwempahla, uthi kuyajabulisa ukubona amazwe anjenge Russia bezoqinisa ubudlelwano leleZimbabwe.
“Sikhangelele ukuthi bazabuya eZimbabwe bazosebenza labantu beMidlands befake amafekitali ukuze sisebenzise i-steel esisithola eMwenezi senze into ezinengi ezehlukeneyo. Sikhangele njalo ukuthi bengabuya bezofaka amafejitali ama-pharmaciticals, emithi ukuze abantu bakithi bebe lemithi. Kunengi esikukhangeleyo ngakho ke sijabule kakhulu ukuthi besilomhlangano lowu.”
Lokhu kusekelwe nguMnu. Nicholas Ndebele, umqondisi wenhlanganiso ebona ngezombukiso wezokuthengiselana oweZimbabwe International Trade Fair-ZITF, obesemhlanganiweni lo.
“Uqakatheke kakhulu ngoba utshengisa ukuthi khona siqinisa ubuhlobo. Thina sithanda ukuthi khona njengeZimbabwe International Trade Fair, u-international kutsho ukuthi khona amazwe atshiyeneyo. So, sithanda ukuthi khona kumazwe atshiyeneyo eze ezezibonele ukuthi khona kuyini esikwenzayo eZimbabwe, bangenzi into zokucabangela ngoba bengakwazi bacine sebekhuluma ezinye izinto ngoba bengazi kodwa sithi wozani lizezibonela amathuba angabe ekhona lani lisitshele ngamathuba akwawenu mazwe. So, siyabuqinisa bona lobu buhlobo.”
Ingcwethi kwezombusazwe, uMnu. Effie Dlela Ncube, owenhlanganiso ebona ngezamalungelo abathengi ye-National Consumer Rights Association, uthi ukuza kwabe Russia kanye leleMelika phose ngasikhathi sinye kuveza kahle kamhlophe ukuthi i-Zimbabwe iqakathekile ngendlela ezehlukeneyo emazweni ahlukahlukeneyo.
“Kwelase Russia iZimbabwe iqakatheke kakhulu kwezenotho kwezenjiwayo, kwelaseMelika, lanxa ngabe iqakatheklile kwezenotho kubuya kuyo kuqakatheke ukuthi ibuswa kahle, ihloniphe amalungelo abantu kube le-democracy lokhetho okukhululekilyo. Kanti ke into ehluphayo yikuthi sibonile laphana emhlanganweni lapha abeZimbabwe ekade behlangane khobna labaseRussia bekukhona lamalunga eZanu PF angasiwo aweGovernment. Okuveza kahle kamhlophe ukuxutshwa kombuso kunye leParty, into eyingozi kakhulu ebanga i-corruption, ebanga ukuthi ilizwe lingabuswa ngendlela efaneleyo.”
Lumhlangano lequla elivele kweleRussia, ungenwe ngabavele kunhlangothi ezitshiyeneyo zomnotho elizweni, abengatsha ezehlukeneyo zikahulumende kanye labehofisi yomeli weleRussia e Zimbabwe.
Iqula lakwele Russia likhokhelwa nguMnu. Vyacheslav Yarin, umphathintambo wezobudlelwano kwezokuthengiselana eSverdlovsk.