HARARE - Ikhomishini ebona ngezokhetho, eyeZimbabwe Electoral Commission, ithi izaqala uhlelo lokubhalisela ukuvota elizweni lonke mhlaka 12 Mbimbitho.
IZEC ithi lolu hlelo luveza ukuba sekuyisibanga saphezulu sokuqala amalungiselele okhetho lwalonyaka.
Ingcitshi ecubungula ezombusazwe labamabandla aphikisayo bathi kumele kube lendawo ezinengi zokubhalisa ukuvota ikakhulu emadolobheni lapho okuhlala khona abantu abanengi kodwa ngomnyaka odluleyo indawo zokuvotela zazizinlutshwane kakhulu.
UMnu Witness Dub,e owebandla leMDC-T elikhokhelwa nguMnu. Douglas Mwonzora, uthi kuqakathekile ukuba kube lendawo ezithe xaxa zokubhalisa ukuvota.
“Ivoter registration kuyinto enhle kakhulu kungakho kumele ibekwe endaweni zonke ukuze abantu bengahambi imango emidenjalo babone lapho abazavotela khona.”
UMnu. Gift Siziba, owebandla le Citizens Coalition for Change, yena uthi kumele uzulu aphiwe ilungelo lokuvota njengalokho okwenzakala kwamanye amazwe.
“Sizaqhubeka sikhuluma labantu phansi kwenhlelo zethu ukuba babhalise ukuvota ngoba yiyo yodwa indlela ezenza ukuba siguqule isimo selizwe.”
Kodwa Ilunga leCentral Committee kubandla leZANU PF, uMnu. Mabutho Moyo, uthi sebelungele ukhetho njalo bayayithemba ikhomishini yeZEC.
“Ibandla leZANU PF liyaqhubeka libhalisa abantu ukuvota. Kasisoli umsebenzi we ZEC, silethemba kakhulu ukuba umsebenzi esesiwenzile umkhulu njalo uzakwenza abantu basivotele.”
Ingcwethi kwezombusazwe, uMnu. Pride Mkono, uthi kumele inhlanganiso ezizimeleyo labamabandla ezombusazwe benze konke okusemandleni abo ukukhuthaza abantu ukuba babhalise ukuvota.
“Kumele kube lendlela zokukhulumisana leZEC ukuze wonke umuntu athole ithuba lokubhalisa kungelani lokuba batholakala ngaphi.”
IZEC yazise njalo ukuthi isizaqala imizamo yokufundisa uzulu ngokuphawulwa kwemingcele emitsha iDelimitation isithi le yiyo yodwa indlela yokuba abantu bazi indawo abazavotela kizo lonyaka.