amalinks wokungena

Breaking News

Izakhamizi koBulawayo Zithi Zidinga Amanzi Ilanga Liphuma Lize Liyetshona


Bakha amanzi kuzibholane koBulawayo
Bakha amanzi kuzibholane koBulawayo

BULAWAYO - Izakhamizi zakoBulawayo zikhala ngokuthi seziqeda amahola amanengi zilinde ukukha amanzi ezikotsho ngenxa yokuvalwa kwamanzi iviki yonke.

Ikhansili yaleli dolobho yethule umbiko othi amanzi ahambe ngoLwesine weviki edluleyo ngemva kokuba idamu leNcema leleFernhill lapho okumpontshwa khona amanzi, kuphazanyiswe yikuhamba kwamandla kagetsi.

Amanye amalokitshi aselensuku ezedlula iviki engela amanzi, osokudala ukuba izakhamizi zesabele ukuqhamuka kwemikhuhlane.

Ngeviki edluleyo ikhansili yako Bulawayo ikhiphe umbiko othi amalokitshi wonke ayabe engela manzi ngaphandle kwenzikini yedolobho kanye lama Industry kubangelwa yikuphazamiseka kwempompi ezidonsa amanzi.

UMnu. Joseph Nkomazana wenhlanganiso yeakhamizi eyeBulawayo Progressive Residents' Association njalo engumgcinisikhwama weWater Executive Council, uthi imbiko eminengi evela ekhansilini bayibonela kubomakhala ekhukhwini labo bengazi lutho.

“Besilokhe sikhuthaza iCity Council kusukisela kudala ukuthi nxa besenza ama public notices ikakhulu aqondane lezakhamizi basazise. lndaba leyi yokuthi amapump awasapompi kuhle amanzi soku affect zakhamizi ukuthi zingatholi amanzi in time ngenxa yokuthi izesa i leproblem siyakuzwisisa ibusiness sector yonke I affected ilizwe lonke. Ezinye izinto before they take them kumaplaforms amanye kumele babize ubukhokheli ikakhulu obukhangelane ledepartment yonaleyo bekhulumisane abantu bazi ukuthi kuhamba njani ngoba lathi kumele sibelobufakazi ngoba lathi sinje siyabuzwa yizakhamizi ukuthi kwenzakalani izulu lisanda kuna kangaka. Njengezakhamizi singahlala sikhuluma ukuthi we are not happy kuyakhanya angathi silwa lekhansili besicela ukuthi ikhansili icacele ubukhokheli nxa isenza into zabo.”

Umsekeli kaSodolobho, uKhansila Mlandu Ncube, upha izizatho ezanza ukuba amanzi avalwe okwesikhathi eside.

“Uhlupho esihlangana lalo yikuhamba kwamagetsi, lokhu asilamandla kikho asila control. Okwesibili yikwebiwa kwentambo zikagetsi kanye lokubulawa kwezakhiwo ezihambisa amagetsi kuma pump stations ethu. Lokhu kwenza ukuthi nxa amanzi esebuya abe le pressure abe sedubula ama pipe phakathi komuzi.”

UMnu. Future Maphosa, isakhamuzi sakoBulawayo semzini oweMganwini, uthi okwenzakalayo kuzadala ukuqhamuka kwemikhuhlane.

“Amanzi asehamba isikhathi eside kakhulu njenge zizalwane zakoBulawayo sesizabuyela kulokhu okwake kwenzeka kunyanga ezadlulayo okwesihudo ngamagetsi asehamba kakhulu osokusenza ukuthi amanzi angasabikhona ngezikhathi ezifaneleyo.Amanzi kumele abekhona izikhathi zonke sesisesabela abantwana besikolo nxa sekunje so.”

UNkosikazi Sukoluhle Mathathu, omunye wezakhamizi, uthi ikhansili kumele ithole ezinye indlela zokuthi umsebenzi wokumpompa amanzi ungami bengathembeli kunkampani yeZESA kuphela.

“Singakhangela Uhlupho olukhona khathesi njengezakhamuzi sake sakhuluma ngakho last year ukuthi ikhansili ayizame ezinye indlela ingathembeli kuZesa kuphela ngoba sizahlala sikhala ngohlupho olulodwa. Singakhangela khathesi isikhathi siyatshintsha we cannot afford generators kodwa akufakwe amasolar ukuthi kupump amanzi ngoba next year siyabe silokhe silapha sikhala ngohlupho lwamanzi.”

Ikhansili yakoBulawayo ivele yatsho ngeviki edluleyo ukuthi indawo ezinengi zizabe zivalelwe manzi namuhla ngemva kokuvulwa kwezinye indawo izolo okwamahola amane.

XS
SM
MD
LG