WASHINGTON DC - Ibandla leZanu PF lithi kusasa lizaqhuba uhlelo lokuhlola amalunga alo aloyisa ukuphatheka kukhetho lwalo lwama-primaries olokudinga abazancintisa belimele kukhetho lwezwelonke oluzakwenziwa kusikhatshana esilandelayo.
Ama-primaries alelibandla azakwenziwa ngempelaviki ezayo ezabelweni zonke zelizwe lapho amalunga eZanu PF azakhetha khona abantu abazamela lelibandla kukhetho lokudinga amalunga ePhalamende, amakhansila kanye loMongameli welizwe.
Ilizwe selimelele uMongameli Emmerson Mnangagwa ukuthi amemezele usuku lokhetho.
UMnu Joseph Tshuma, ilunga leZanu PF Central Committee uthe, "Abamela ibandla lethu kungaba ekhansilini; kungaba edale lephalamende kumbe kuSenate, thina njengebandla leZanu PF asiphongugxumekela nje.
"Kuyavethwa, sibone ukuthi umuntu usewazi umhlangano, uselesikhathi esemhlanganweni, izifiso zomhlangano. Izifiso zomhlangano zigoqela i-liberation struggle' ukuthi ngumuntu ole-ideology epheleleyo.
"Yikho ubona silesikolo lesi okuthiwa yiHerbert Chitepo School of Ideology," kuchasise uMnu. Tshuma
