amalinks wokungena

Breaking News

Abantu Abanengi Babhalisela Ukuvota Kukhetho Oluzakwenziwa Lonyaka


Abanye abantu ababhalisele ukuvota koBulawayo ngoMvulo. (Photo: Annahstacia Ndlovu)
Abanye abantu ababhalisele ukuvota koBulawayo ngoMvulo. (Photo: Annahstacia Ndlovu)

BULAWAYO - Kulabantu abanengi emadolobheni lemaphandleni abahambe endaweni ezifakwe yiZimbabwe Electoral Commission (ZEC) ezokubhalisela ukuvota kukhetho oluzaqhutshwa lonyaka.

IZEC ithi luqhubekela phambili kahle uhlelo lolu oluqale ngeSonto njalo oluzagqitshwa mhlaka 21 Mbimbitho.

IZEC, ebambisana lohlangothi olunika uzulu izithupha, kukhanya ithwele amagabha avuzayo kwezinye indawo ngenxa yokungasebenzi kahle kwemitshina yabo.

Lokhu kuchothozwe nguMnu. Ian Makoni, obona ngenhlelo ezitshiyeneyo kubandla leCitizens Coalition for Change. Uthi kalusoze luqhutshwe ngemfanelo uhlelo lolu uma kungaqhubekela phambili ukungasebenzi kahle kwemitshina yeZEC.

Uphinde wathi kukhanya engani ukuhlelo lokunika abantu izithupha lwenziwa endaweni ezingatsho lutho emadolobheni kuthi emaphandleni kukhanya luqhutshwa kahle.

Abantu baphume ngobunengi koBulawayo besiya bhalisela ukuvota, ikakhulu labo abasebenzela enzikini yedolobho endaweni yamavinkili eGodini, okubonakale indwendwe ezinde kusukela ekuseni ilanga laze layatshona.

UNkosikazi Beauty Moyo, isakhamuzi semzini weNkulumane, ngomunye wababhalise ukuvota.

“Angizange ngihlangane lobunzima ngesikhathi ngibhalisela ukuvota lamhlanje. Kuqale kuphuza umzila ungahambi kodwa kwaya kwabangabeno. Mina kunguthathele 45 minutes ukuthi ngibhalisele ukuvota njalo ngikhuthaza abanye ukuba beze labo bazobhalisela ukuvota lokuhlola amagama abo.”

UMnu. Fuyane Dube, isakhamuzi seMabonyane, uthi kakababoni lutho esigabeni sakhe seKezi kodwa uzwile ngohlelo.

“Uhlelo ngizwile ukuba seluqalile ezweni kodwa kumango wakithi bengingakababoni kuWard 10. Bazakuba seMarinoha leTshehondo okwamalanga amanili.”

UBenon Ncube, umkhokheli wenhlanganiso zezifundi zemakolitshini lamaUniversity, eyeZimbabwe National Students Union, ukhala ngokuthi indawo zokuthi abafundi babhalisele ukuvota zikude labo.

“Sibelalo uhlelo lokuhamba silimukisa abafundi ukuthi beyebhalisela ukuvota duze kezikolo zabo kodwa uhlupho olukhona yikuthi abafundi abanengi abalamali yokuyabhalisela ukuvota ngoba indawo xokubhalisela ukuvota zinginango.”

Isikhulumi sebandla leCCC koBulawayo, uMnu. Swithern Chirowodza, ukhuthaze abantu ukuthi bayebhalisela ukuvota loba kukhona abakusolayo.

“IZEC ngabe iqale yaqeda ukubhalisela abantu ukuvota yathi isikhupha izigaba zokuvoteka. Kungenani loba sikakho esikusayo ngeZEC ngibakhuthaza ukuba bayebhalisela ukuvota ngobunengi.”

Ilunga leZanu- PF koBulawayo, uMnu. Bangira Shumba, uncome ukuqhutshwa kwaloluhlelo edolobheni leli.

“Uhlelo lolu lokubhalisela ukuvota luhamba kahle koBulawayo njalo adikabilalutho esilusolayo engingakutsho yikukhuthaza abantu ukuba bayebhalisela ukuvota ngobunengi ngoba njalo kulilungelo labo elikusisekelo sombuso welizwe.”

Iziphathamandla zeZEC koBulawayo zichaze ukuba ukubhalisela ukuvota edolobheni leli kuqhubeka kuhle njalo kulamaMobile Biometric Voter Registration Centers alitshumi lambili isigaba sinye silomtshina owodwa.

Balile ukuchaza inani labantu asebebhalisele ukuvota izolo bethi intathelizindaba azibhaliselanga ukuthapha indaba kuhlelo lolu.

XS
SM
MD
LG