GABORONE - EleBotswana lithi abeZimbabwe abangena kulelizwe okungekho emthethweni, abasoke bephiwe isiphatho esehlukileyo esingabavumela ukuthi bahlale kumbe besebenze bengelamaphepha aqondileyo.
Amanye amalunga edale lephalamende aphanyeke udaba lokuthi abeZimbabwe abangena kwele Botswana okungekho emthethweni, kumele bangabotshwa, kodwa bavunyelwe ukusebenza kungatsha abalolwazi kizo.
Elinye ilunga ledale lephalamende, uMnu. Carter Hikuama, uthi akusizi ukuthi eleBotswana libe lidlalisa imali libuyisela abeZimbabwe emuva.
Uthi ngabe uhulumende uyacabangisisa ngodaba lolu abenzele amaphepha okuhlala lokusebenza eBotswana kukhangelwe ulwazi lwabo kungatsha ezitshiyeneyo.
"Singathola njani ulwazi lwabo olungancedisa ukuthuthukisa umnotho wethu. Ngibona bengabantu abalolwazi esingelalo olungaphathisa ilizwe lethu, kodwa ngibona uhulumende ebabuyisela emuva.”
Umphathintambo obona ngendaba zasekhaya kweleBotswna, uNkosikazi Annah Mokgethi, uthi ilizwe lakhe liyathakazelela indlela abeZimbabwe abangene okusemthethweni, abathuthukisa ngayo umnotho.
Uthi kodwa abasoke bagobe bevumele abantu bengena elizweni okungekho emthethweni, ngakho abayeqa umngcela bazaqhubeka bebanjwa bebuyiselwa emuva.
“Engingakutsho yikuthi ilizwe leli lipromota ukungena elizweni okuqondileyo. Njengelizwe asingeke sapromota ukweqa komngcele. Abangena njalo sizababuyisela.”
UMnu. Cephas Tshuma, oweZimbabwe Community kwele Botswana njalo elilunga lekhomithi yeDiaspora Policy, uthi udaba lokuthi abeZimbabwe baphiwe amaphepha okuhlala elizweni seluhlafunwe kanengi.
“Sesilesikhathi eside njenge Diaspora Community Policy sizama ukuthi lulungiswe. Okuhluphayo yikuthi akwaziwa ukuthi abeZimbabwe abaseBotswana bangaki. Uhulumende weBotswana angenza kube lula ukuthi abaphe amaphepha.”
UTshuma ukuthi ukubuyisela abantu abangene elizweni okungekho emthethweni akuphathisi ngalutho.
"Into yokubuyisela emuva ayisebenzi. Abantu abasebenzi kuhle, kubotshwa kakhulu ekupheleni kwenyanga. Into yakhona ayilunganga. "
Umphathintambo Mokgethi yena uyala ngokuthi abantu kumele bangene ngokusemthethweni bazo cela incwadi zokuhlala lokusebenza kweleBotswana.
Uqhubeke ethi abeZimbabwe abaselizweni okusemthethweni bazisebenzela kuhle kakhulu, njalo yibo abakunani elinengi abalamaphepha okuhlala lokusebenza kweleBotswana. Ngale indlela, eleBotswana uthi lithola ulwazi kwabeZimbabwe abaselizweni okusemthethweni.
Kulabe Zimbabwe abaphose befike inkulungwane ezinthathu abalamaphepha okusebenza kweleBotswana, kodwa kulenengi elihlala elizweni lingelamaphepha aqondileyo.