Ibandla le CCC lithi ukhetho lwama Primaries ebandla le Zanu PF luveze ukuthi lelibandla liyaxokozela.
Ilizwe lonke jikelele libe lokhetho lwebandala le Zanu PF lapho okubekhona inkulungwane zabantu abavotileyo.
Kulabanengi abakade bengamalunga edale le phalamende abanqotshiweyo ababilisa oMnu. Joseph Chinotimba, Mangaliso Ndlovu, Phillip Chiyangwa, Sekai Nzenza, Webster Shamu, Abednicho Ncube, Kindness Paradza, Dexter Nduna, Mary Mliswa labanye.
Abenelise ukungena babalisa umhlabeleli, uSandra Ndebele osezamela ibandla le Zanu PF esigabeni se Pelandaba lomphathintambo wezemali, uMnu. Mthuli Ncube ozamela iCowdray Park.
UMnu. Qhubani Moyo, uMqondisi womsakazo we KeYona TV unqotshiwe esigabeni se Insiza.
Sixoxe lesikhlumeli sebandla le CCC koBulawayo, uMnu. Swithern Chirowoda saqala ngokumbuza ukuthi amanani abantu abavotileyo kulolukhetho awabayethusi na?
Kusenjalo, ukhomisari webandla le Zanu PF, uMnu. Mike Bimha utshele umsakazo we ZBC izolo ebusuku ukuthi ukhetho lolu lumisiwe ezigabeni ze Midlands le Masvingo ngoMgqibelo lwenziwa izolo.
Uthi impumela yokhetho lwalezizigaba izakwethulwa namuhla.
Siphinde saxoxa locubungula ezombusazwe, uMnu. Max Mkandla, njalo owalwa impi yenkululeko.