TSHOLOTSHO - Ababalisi besikolo seMbalibali esiqintini seTsholotsho South bathi bahlukunyezwa njalo batshontshelwa impahla yabo yizigangi ezaziwayo, osokusenza bafune ukutshiya ukufundisa kules’isikolo.
IStudio 7 yethekelele isikolo lesi ukuthi iyezibonela ngokwenzakala eMbalibali Secondary School kulandela imbiko yodlame kulindawo yathola ababalisi bemi manzonzo bekhuluma ngokutshiya ukufundisa kulesisikolo. Uphathi waso, uNkosikazi Gaule, uthi balala obukanogwatsha.
"Ayi, lapha silohlupho sibili esecondary ngale kukhanya kulabantu aba-vandiliza indawo lanxa sikhona khonangale bayabuya beqoqoda belayitha ama-torch into abazenzayo bayasibulalela singavela siphume bayabulala amawindi bayabulala i-cottage yonaleyo esilayo. So, khathesi sihleli nje e-primary. Bayangena even khonapha sebekele bathathe inkukhu zesikolo. Ayi, vele into zakhona ayimbalibali ayikho safe."
Uyaphambili uNkosazana Gaule esithi ababalisi bakhe abanengi sebefuna ukutshiya njalo ubona engani izikolo zingavalwa abaphenduki abanengi.
"Ngendlela umumo wakhona oyiwo wona, ayi sebengabaleka sibili ngoba labo bayazikhulumela sibili ukuthi akukho safe lapha impilo zethu zisebuzimeni ngoba ungakhangela indlela okwenzakala ngakhona. Kodwa abakwenzayo kukhanya ngabantwana abancani abaziwayo esigabeni. Angazi ukuthi uhlupho lwakhona lungaphi ekuthini abantwana labo babanjwe behanjiswe emapholiseni."
Omunye umbalisi walesikolo, uNkosazana S. Moyo, uthi usetshiya ukufundisa eMbalibali.
"Ukuba ngumbalisi asocala silapha sizama ukunika ulwazi abantwana ukuze bafunde bebelekusasa engcono kodwa sesihlalela evalweni. Umuntu uyaretshwa la kungelamuntu ozamvikela yikho mina sengifuna ukutshiya isikolo lesi. Abazali bayazazi izigebenga lezi kodwa bayesaba ukulwisana lazo."
USobhuku Mahlanza wakulesigaba watshaywa kabuhlungu yizigebengu lezi ekhuza ukuthi bangahluphani lababalisi. Uthi amapholisa angaze abizwe kabuyi.
"Bayenza yonke into abayifunayo, amawindi sesithenge kabili belokhe bebulala yikho thina sesiseba abantwa bethu. Bangitshaya ngamatshe ngayavukela eTsholotsho esibhedlela. Njenga seTsholotsho amapholisa abayazi into abayenzayo. Sesizamile sibili ngazo zonke indlela. Sizamile ukuthi sibhale incwadi sayinikeza amapholisa yena umkhulu wamapholisa. Sayinika lo-major-in-charge wayehluleka laye ukuthi kwenzakalani. Nxa kungabuya kumbe iriot ihle izosearcher igang yabafana lapha ibone ukuthi kwenzakalani ngoba bahamba bephethe izikhali, imkhonto bayagwaza bayabulala."
IMbalibali Secondary School yakhiwa yizizalwane zakulindawo ezihlala eSouth Africa. UMnu. Nqobile Ncube ngomunye wabanye ababuthanisa imali yokwakha lesisikolo
"Thina sasebenza nzima sahlanganisa imali ukuthi sakhele abantu bakithi i-secondary school ukuze abantwana bethu bafunde eduze. Nxa amatitsha esehlukuluzwa yizigelekeqe masinya so kutsho ukuthi siyadlala. Isikolo lesi silomnyaka owodwa kuphela sakhiwe, uyazi ngizwa ubuhlungu kakhulu."
Isikhulumeli samapholisa eMatabeleland North Province uInspector Banda uthi kakatholi umbiko onjalo ovela eTsholotsho.
"So far I haven't heard that’s why I am saying maybe ungasendi lokhuzeni information yonaleyo via Whatsapp uzanginika nami isikhathi sokuthi ngibengikhuluma labo abeTsholotsho ngibone ukuthi how far what’s really going on."
Izakhamizi ezinengi zithi zibhekane lohlupho olukhulu njalo ikusasa yabantwababo isimnyama ngenxa yizigebenga lezi ezaziwayo kodwa ziyesaba ukukhomba ngoba ziyatshaya njalo ngeke balwisane labantu abahlomileyo.