WASHINGTON - Abezindaba abeAssociated Press babika ukuba owayengumongameli wakwele Melika, uMnu. Donald Trump, uzazihambisa eNew York kwabathonisa icala lokuba wasebenzisa okungekho emthethweni imali yokukhankasela ukhetho lukamongameli ngomnyaka ka2016.
Akucacaci ukuba abaku grand jury abavotele ukuba ulecala lokwenza okungekho emthethweni balubeke njani udaba lolu ngoba abakwenzileyo akukavezelwa uzulu.
Bathe kumele amiswe emthethwandaba ukwenzela ukuba athoniswe akwenzayo ngoba kwephula imithetho yokhetho lweMelika.
UTrump kubikwa ukuba wahlawula imali ethe xaxa uNkosazana Stormy Daniels, okucatshangelwa ukuba waya laye emacansini, esenzela ukuthi engakhulumi ngodaba lolu ngesikhathi ekhankasela ukhetho luka2016.
UTrump uthi konke lokhu kwenziwa nguhulumende kaBiden, owesaba ukuba uzavotelwa ngabantu kukhetho oluzakwenziwa ngomnyaka ozayo. Lokhu ngokokuqala ukuba owayengumongameli abotshwe kwele Melika.
Loba kunjalo, ulakho ukuncintisa kukhetho oluzakwenziwa ngomnyaka ozayo.
UMnu. Gift Ostallos Siziba, umsekeli wesikhulumeli sebandla leCitizens Coalition for Change, uthi okwenzakala eMelika kungeke kwenzakala eZimbabwe.
Lokhu kusekelwa nguMnu. Thabang Nare, ingcwethi kwezombusazwe ezimeleyo.
UMnu. Joseph Tshuma, okudale leCentral Committee kubandla leZanu PF, uthi eleZimbabwe lilemithetho ebalulekileyo eyokuthonisa amacala.