GABORONE - EleBotswana likhala ngabe Zimbabwe abangena kulelozwe okungekho emthethweni besiyakwemba igolide ikakhulu endaweni eziseduze ledolobho elisemngceleni wamazwe womabili eleFrancistown.
UMnu. Wynter Mmolotsi, ilunga ledale lephalamende elimela idolobho leFrancistown lendawo eziseduze lithi loludubo seluqhele okwedlulisa amalawulo, lamapholisa esehluleka ukululwisa. Indawo yeFrancistown, yona engekho khatshana lomngcele weZimbabwe, ilegolide elinengi.
UMmolotsi utshele iStudio 7 ukuthi lokhu sekukhange abeZimbabwe asebegcwele indawo yonke, betshiya lamagodi angagqitshelwanga.
“Kulenkulungwane lenkulungwane zabeZimbabwe abangena bezokwemba igolide okungekho emthethweni. Sekulesikhathi lokhu kusenzakala. Abomthetho bayamaza kodwa akulula.”
UMmolotsi uqhubeke esithi abantu abangena bezoyemba igolide bacina bedala amacala. “Sekudale ukuthi kuqonge ukudalwa kwamacala. Kuliqiniso sibili ukuthi silohlupho. Sengicele umpathintambo wezomvikela ukuthi aphathise abone ukuthi abantu bethu bavikilekile.”
Kulokukhathazeka. “Kumele sibone ukuthi ezinjiwa zethu ezigoqela igolide, ziyavikelwa. Uhlupho olukhona yikuthi abantu laba sebethathela abantu bethu ilitshe eliligugu okumele ngabe baphila ngalo.”
AbeZimbabwe abahlala eBotswana abafana lomnunzana Ntokozo Thebe bathi noma kungalunganga okwenziwa ngabemba igolide okungekho emthethweni, yinto engamangalisyo. “Vele khona kuyatshengisa indlela abantu abaziphatha ngayo ekhaya besemba igolide indawo yonke, yikho asebekwenza eBotswana. LeSouth Africa uthola ukuthi bakhona, njalo lokhu kulengozi.”
UMnu. Mkhululi Moyo, ohlala eGaborone, uthi kulihlazo ukuthi konke okungahambi kuhle kugconwa kwabeZimbabwe.
“Abantu sebehamba bedinga ukuziphilisa laloba ngaphi, kwesinye isikhathi befaka impilo zabo engozini. Lokhu akusibeki esimeni esihle singabantu beZimbabwe, asikhangelwa ngelihlo elihle.”
Abanye sebeke bamiswa phambi komthethwendaba phezu kokwemba igolide okungekho emthethweni kodwa amapholisa kweleBotswana athi lokhu kuyaqhubeka kungabuyeli emuva. Inengi ngelingena liyembe ngitsho lebusuku beselichapha umngcele libuyele ekhaya lingasebenzisi indlela eziqondileyo zokuhamba.
Kusenjalo, eleBotswana likhala ngabeZimbabwe abasetshenziswa ukuntshontsha umhlabathi wokwakha endaweni ezitshiyeneyo, amapholisa ekhala ngokuthi kufakwe imthetho eqinileyo ezakwenza kube lezigwebo ezilukhuni.