BULAWAYO - Ibandla eliphikisayo eleCitizens Coalition for Change (CCC) ngoLwesithathu liqhube uhlelo lokukhetha abazalimela kukhetho lwezwelonke olukhangelelwe ukwenziwa ngoNtulikazi kumbe ngoNcwabakazi lonyaka.
Ibandla leli lithi uhlelo lolu luhambe kuhle endaweni ezinengi zelizwe.
Kodwa kwezinye indawo ezifana lakoBulawayo luphuzile ukuqala njalo bekulokuxokozela abanye abasekeli bebandla besithi abazwisisi ukuthi kungani iCCC ikhethe ukusebenzisa uhlelo lweCitizens Community Consensus Candidate Selection Procedure kulokuthi yenze ama-primary elections asegcekeni.
Omunye wabakhonone ngaloluhlelo ngumsekeli weCCC uMnu Methuli Nyathi.
Amazwi akhe agcizelelwe nguMnu Mandla Tshuma, laye ongumsekeli walelibandla koBulawayo.
Obebona ngezokhetho kuCCC uNkosikazi Helen Stepiso Zivira uvumile ukuba uhlelo aluqalanga kahle koBulawayo.
Umsekeli wesikhulumeli seCCC uMnu Felix Magalela Mafa Sibanda uthe lanxa bekhona abakhononayo, lapho ahambele khona kahlangananga lodubo oluyangaphi.
Lisiyatshona ilanga koBulawayo ibandla leCCC belilokhe lingakaqedi ukukhetha abazalimela kukhetho lwamakhansila, lamalunga ephalamende oluzakwenziwa lonyaka ngoNtulikazi kumbe ngoNcwabakazi.
Asebekhethiwe bagoqela umkhokheli weCCC uMnu Nelson Chamisa, uMnu Thamsanqa Ncube ozancintisa kukhetho lwamakhansika kuWard 21, umsekeli wesikhulumeli sebandla uMnu Gift Ostallos Siziba, yena ozancintisa edinga ukuba lilunga lephalamende emela isigaba seBulawayo South, uMelusi Nyathi okhethwe ukuba lilunga ledale leSenate, uSeyiso Moyo okhethwe ukuba lilunga lephalamende emela iBulawayo Central, loTsepiso Helen Zivira okhethwe ukuba lilunga leSenate.
