Zithobelene esigabeni se Cowdray Park lapho okuzadibana khona umphathintambo wezemali, umnu. Mthuli Ncube loNkosazana Thokozani Khupe kukhetho oluzayo.
Kodwa kwezinye izigaba ibandla le Citizens Coalition for Change lithi lisaqoqa amabizo alabo abazancintisa kukhetho abakhethwe ngumphakathi kuhlelo lwalelibandla olutsha olokungasebenzisi ama primary elections ukukhetha labo abazancintisa kukhetho oluzayo.
Isikhulumeli salelibandla, uNkosazana Fadzai Mahere uthi ngemva kokukhethwa, kuzalandela uhlelo lokuhlola abakhethiweyo ukuthi bafanele na ukuba ngabakhokheli, kulandele eminye imihlangano lezakhamizi, lengcwethi, andubana kumenyezelwe labo abazancintisa.
UMnu. Mhlonipheki Ncube, umgcinisihlalo webandla leCCC eMatabeleland North uchasisele uSithandekile Mhlanga weStudio 7 okunengi ngaloludaba.
Siphinde saxoxa loMnu. Solani Njemnyama Moyo, umgcinisihlalo walelibandla eMatabeleland South, ukuze sizwe ukuthi baluqhube njani loluhlelo.
KoBulawayo, isikhulumeli salelibandla uMnu. Swithurn Chirowodza uthi uhlelo lokukhetha abazancintisa solufika emaphethelweni njalo ulandule imbiko ethi kulemizamo yalelibandla eyokuthi kuncintise abaseShoneni endaweni ezinengi.