UMongameli Emmerson Mnangagwa ubesedolobheni lakoBulawayo lapho akhulume emkhosini wabasakhulayo owe Vision 2030 Movement ekhuthaza intsha ukuthi iyekele ukuthatha izidakamizwa ngoba zibulala ikusasa yazo lokubhidliza imzimba njalo kubisela intuthuko yelizwe emuva.
Umkhosi lo ubusenziwa ngaphansi kwensikimba ethi "Creating A Young People-Led Economy by 2030, through Fighting Drug and Substance Abuse, UMnangagwa utshele ontanga laba ukuthi uhulumende wakhe wenza imzamo emkhulu yokumisa kokuthathwa kwezidakamizwa ngabasakhulayo ngokubopha bonke abaphatheka abathengisa lokuthatha izidakamizwa.
Uhulumende wami uzimisele ukubona iZimbabwe engela muntu othatha izidakamizwa lokusebenzisa okudakayo. Yikho sibuye lapha ukuzolisekela. Kumele libese ndleleni eqondileyo hayi ukwenzela amapholisa kuphela kodwa ukuthi lizenzele lina ngokwenu ukuze libe lempilakahle.
UMongameli Mnangagwa uyephambili esithi abasakhulayo zinkokheli zakusasa.
Lizinkokheli zakusasa and lani kusasa lizaba ngabake babazinkokheli, lingakuthathi kancane lokho, liqiniso lempilo. Indikimba yenu yalumhlangano yokuthi ukwakho inotho entsha yelizwe ekhokhelwa ngabatsha ngo 2030 ngokulwisana lezidakamizwa siyayamukela ngenxa yomumo okhona.
Umculi wakoBulawayo uSandra Ndebele yena ongumunye ophatheka kuhlelo lwabatsha lwe Vision 2030 Movement leWomen for ED uthi sengene kwezombusazwe ukuthi ancedise abasakhulayo.
"Ngiza leader by example in everything that l do and ngiza encourager labanawami labasakhulayo ukuthi asidingeni ezinye indlela zokuthi siphile kolukuthi sibe sithatha izidakamizwa ngoba izidakamizwa ziyasibulala and zisibulalela ikusasa lethu. Kuzacina kungasela ma leaders of tomorrow because sonke siyabe sesistikhile like what he said so mina umsebenzi wami ngowoku sensethayiza loku encourager abasakhulayo asizameni ukudinga indlela zokuphila than ukuthatha umtoriro."
Bekulabantwana abanengi bezikolo zama secondary schools akoBulawayo. UMnu Leeroy Moyo ngumbalisi osakhulayo weMagwegwe Secondary School.
"Ama drugs akhethi kuphela izikolo, ase affector yonke icommuninty. Abantwana abanengi vele these days ama drugs sebatshayile sibili so bekulithuba elihle nje ukuthi abantwana bethi ukulimukiswa ngendaba lezi zama drug abuse.
Amazwi kaMoyo agcizelelwa ngomunye umbalisi uMiss P Ndlovu.
"Mina ngizwile ukuthi abantwana lathi sizafika lathi sibatshele khonokhu esikufunde la ukuthi ama drugs kawalunganga. Isifiso sami yikuthi ngabe bonalaba abama drugs campaign bayabuya ezikolo ukwenzela ukuthi kufunde isikolo sonke, cause as we speak khathesi thina sibuye le 5 sitshiye something like 1000 students ngale abayabe bengafundanga, so siyafisa ukuthi ngabe bayabuya bafundise isikolo sonke"
Inhlanganiso elwisana lomkhuhlane we HIV-AIDS eye Zimbabwe National Aids Council ikhala ngokuthi umkhuhlane lo sumemetheka kakhulu kwabatsha ikakhulu abathatha izidakamizwa ngoba bedakwa bengazivikeli nxa bengena emacansini. UMnu Bekithemba Ngwenya ukhuza intsha.
"Intsha ayitshiyane lezidakamizwa lokudakayo badinge ezinye indlela zokuzilibazisa ngabe ngama sports kube yimisebenzi yezandla asizame ngazo zonke indlela ukubakhuthaza ukuthi batshiye okudakayo. Layo inkuthazo yami iyebadaleni futhi abadala asinanzeleleni ukuthi asiphi abantwana imali mahlayana abangakwaziyo ukuthi bayise ngaphi ngoba imali yonaleyi iqalisencane icine inengi kakhulu abantwana bacine sebe experimenta ezintweni ezidakayo.
Udubo lwezidakamizwa lusabalele ilizwe lonke kweleZimbabwe. Lanxa uMongameli Emmerson Mnangagwa ngomnyaka ophelileyo wasungala umkhankaso wokulwisana lomkhubo omubi lo, wokusetshenziswa lokthengiswa kwezidakamizwa, oweNational Anti-Drug and Substance Abuse Campaign ukuvimba kokuthathwa kwezidakamizwa ngabasakhulayo kukhanya yikutshaya idwala ngempama ngoba inanimate labathatha izidakamizwa liya liqonga nsukuzonke.