WASHINGTON - Abadabuka eZimbabwe abahlala kwele South Africa bathi balandela kakhulu udaba oluphanyekwe emthethwandaba yinhlanganiso yeHellen Suzman Foundation, olumayelana lama Zimbabwe Exemption Permits, azamiswa ukusebenza ngoNhlangula lonyaka.
Bathi kukhanya zindala zombili emthethwandaba ngoba kuzwakala engani amagqwetha enhlanganiso le lakahulumende ehlukene kakhulu ngamaphepha la, aphiwa abantu abafika phose inkulungwane ezingamakhulu amabili – 178,000.
Abalamaphepha la batshelwa nguhulumende wakwele South Africa ukuba bedinge amaphepha amatsha kungakapheli uNhlangula lonyaka.
Kodwa abanengi bathi abakaphendulwa nguhulumende.
UMnu. Bongani Mkhwananzi, isikhulumeli senhlanganiso yeZimbabwe Community in South Africa, uthi udaba lolu lulakho ukulungiswa ngabezombusazwe hatshi imithethwandaba.