WASHINGTON - Ibandla leCitizens Coalition for Change (CCC) lithi liqhubekela phambili lidinga abazalimela kukhetho olukhulu oluzakwenziwa eZimbabwe lonyaka.
UNkosazana Ellen Shiriyedenga, obona ngezokhetho kubandla leli, uthi luqhubeka kahle uhlelo lweConsensus Candidates’ Selection.
UNkosazana Shiriyedenga uthi kukhangelelwe ukuba isigaba abakuso khonamanje sizagqitshwa ngesiphangiphangi.
Kulabantu abazinkulungwane ezingamatshumi amathathu – 30,000 abafisa ukuncintisa kukhetho oluzayo bekubandla leCCC.
Kusenjalo, abakubandla leZanu PF bathi sebengena kuzulu ngamandla ukwenzela ukuthola amavoti amanengi kukhetho oluzayo.
UMnu. Malaki Nkomo, okubandla leli, uthi kusobala ukuba bazanqoba kukhetho oluzayo, oluzakwenziwa ngoNtulikazi kumbe ngoNcwabakazi.