MARYLAND - Umphathintambo kahulumende wakwele Melika obona ngokudlelana lamanye amazwe, uMnu. Antony Blinken, namuhla uxoxisane loMnu. Anthony Guterrez, unobhala jikelele weUnited Nations, kanye loMnu. Moussa Faki Mahamat, umngcinisihlalo weAfrican Union Commission, ngokwenzakala kwele Sudan, okulabantu abedlula kancane amakhulu amahlanu – 512 asebefile empini yomvukela.
Lokhu kwenzakala ngesikhathi abalwisana empini le – uGeneral Abdel Fattah al-Burhan okhokhela ibutho leSudan loGeneral Mohamed Hamdan Dagalo, okhokhela icele lebutho eleRapid Support Forces, bevumelane ngoLwesibili ukuba kubekwe izikhali okwensuku ezintathu amazwe wonke ezama ukususa izizalwane zawo kulelolizwe.
Kodwa abezindaba abeReuters babika ukuba iqhubekela phambili impi le kwezinye indawo eKhartoum.
Kubikwa njalo ukuba kulabantu abanengi, abagoqela abadabuka eZimbabwe, abafisa ukuhlengwa ngamazwe abo lenhlanganiso ezizimeleyo.
EleZimbabwe lithi kulabantu abafika phose amatshumi amahlanu asebelamatikiti okugada indizamtshina besuka ePort Sudan besiya ekhaya. Bakhangelelwe ukuba bazafika eZimbabwe kusasa.
Amacele alwisanayo angalalela na umanyano weAfrican Union amise impi le?
Ukuze sihlaziye udaba lolu, sixoxe loMnu. Thabang Nare, ingcwethi kwezombusazwe ezimeleyo, othi kuzakuba nzima ukuba lulungiswe udaba lweSudan.