HARARE..................
Umthethwandaba kaMantshi owe Harare wethule isigwebo sokuba uMnu. Jacob Ngarivhume okhokhela ibandla le Transform Zimbabwe ahlale ejele okweminyaka emine, ngemva kokumfumana elecala izolo lokutshotshozela udlakela elizweni alibotshelwa ngomnyaka ka2020.
UMantshi Feresu Chakanyuka, ucine esithi uNgarivhume uzahlala ejele okweminyaka emithathu ngemva kokubeka eceleni umnyaka nxa engahlala iminyaka ethile engadalanga cala linye, wala lokuthi ahlawulele ifine kuleli cala esithi ukumbvumela ukuthi enze njalo kungalaulaza icala elikhulu alidalayo.
Abatshutshisi bakahulumende batshele idale ukuba uNgarivhume ulabalandeli abanengi kungakho umbiko wakhe wawu lakho ukubangela udlakela elizweni.
Bathe kungasi mapholisa lenhlangothi zika hulumende kwakuzaba lodlakela olumangalisayo kuleli.
Kodwa iqgwetha lika Ngarivhume uMnu Lovemore Madhuku utshele umthethwandaba ukuba akula cala eladalwa nguNgarivhume, ethi umthethwandaba umthole ele cala loba nje kungela bufakazi bokuba nguye loba hatshi owaloba ku Twitter.
"Idale lalile ukuba sibhadale imali. Bathe okungcono yikuthi aye ejele. Bathi uzahlala okweminyaka emine ejele. Uzahlala okweminyaka emithathu"
Umsekeli wesikhulumeli seCCC uMnu Felix Mafa uthi bayethuswa yisigwebo lesi.
"Kuyasethusa ukuba uzahlala iminyaka emithathu esejele. Kutshengisa ukuba isikhathi esiphila kiso sinzima"
Ingcitshi kwezombusazwe uMnu Tjenesani Ntungakwa uthi kusobala ukuba uhulumende ulwisa abantu abamphikisayo.
"Uhulumende usebenzisa umthetho ukugweba abantu acabangela ukuba bayamphikisa. Lokhu sokufana lokuba sebevala inhlanganiso zezombusazwe"
U Ngarivhume ubikwa watshotshozela udlakela embikweni awuloba ekhasini lakhe lenkundleni yokuxhumana eye Twitter ekhuthaza uzulu ukuthi angene emigwaqweni atshengisele ngomnyaka ka2020, ekhonona ngokungamanga kuhle komumo elizweni. Lokhu kutshengisela kakusaqhutshwanga ngmva kokubotshwa kwakhe uNgarivhume labanye abagoqela intathelizindaba u-Hopewell Chin’ono lommeli weZengeza West edale lephalamende uMnu. Job Sikhala. UNgarivhume uyalilandula leli cala esithi asuye owaloba kuTwitter njalo lelo khansi kalisilo lakhe abambophela lona.