BULAWAYO - Abongi baseZimbabwe sebetshele umqhatshi ukuthi abaphe iholo lamadola eMelika, aphezu kwamakhulu ayisitshiyagalombili - US$840.
Abongi bathi sebekhetha ukuyakuba yizigqili kwamanye amazwe ngoba iholo abalithola kweleZimbabwe lingeneli lutho.
Lokhu kuvele ngesikhathi ikomithi ekhangele ezempilakahle ibhoda elizweni lokhe isizwa izikhalazo zabempilakahle. Abongi bakhonona njalo ngokungaphiwa incwadi zabo zokuqeqetsha lalapho sebeqedile iminyaka emithathu besebenzela uhulumende okubizwa ngikuthi yi-bonding.
Lalapho sebesiya sebenza kwamanye amazwe uhulumende ubahlawulisa amadola eMelika, angamakhulu amathathu-US$300, okuyimali abathi kabayanelisi.
KoBulawayo ikomithi yezempilakahle ibisesibhedlela seUnited Bulawayo Hospitals ngoLwesithathu lapho abongi abathole ithuba lokwethula izikhalazo zabo.
Umnumzana Bhekumuzi Ndlovu ongumongi uthi uhulumende kumele aqakathekise izisebenzi zakhe ngokubanikwa iholo elihambelana lomsebenzi wabo langokufunda kwabo.
“Njengabongi kumele sikhumbuleke nguHulumende, uHulumende kumele ahlale ekhangela izikhalazo zethu ngoba asizo zikhalazo zamanga kodwa yizinto zeqiniso. Akwenzi ukuthi umuntu ethi ekhangele umphefumulo womunye umuntu kodwa ebe esamukela imali engamsebenzeliyo empilweni. Kuba nzima ukuthi asebenze ngoba kuzafanele ukuthi acabange ukuthi uzahlanganisa njani ezinye izinto ezinjenge mali zesikolo zabantwana lokudla, kanye lemali yokuthi ehambe emsebenzini. Ngakho ke uHulumende kufanele aqakathekise abasebenzi bakhe, ebanike iholo elihambelana lomsebenzi abawenzayo okungumsebenzi omkhulu kakhulu ongafanelanga ewuthathele phansi.”
UNkosikazi Sanele Moyo umongi uthi kungalesi sizatho inengi labongi sebebaleka elizweni besidinga umsebenzi kwamanye amazwe.
“Kuyaphetsheya kungcono kakhulu, ngoba khathesi asiholi imali eyenelisa ukuphilisa imuli zethu. Lohulumende kasingezelelanga iholo last month asazi kumbe sitshiyelweni thina. Lokhu kusenze saba demotivated ukusebenza”
UNkosikazi Wakhekile Jele uthi akula ngeyinye indlela ngaphandle kokuba umqatshi angezele iholo.
“Imali singayamukela kuhulumende nxa sethe wehluleka yi US$840, ukuthi sitshone sikhuluma ngeRTGS eliwa ivalue nsuku zonke kuyasibuyisela emuva. Ungakhangela imali izifakwa yi Nurses Council zifakwa nge USD, i verification fees yi US$300. Khathesi ama practicing certificates abefakwe nge USD sibhadala nge rate yalelo langa, okungangokuthi lathi sekumele sihole i USD. Ngaphandle kwalokhu i exodus izaqhubekela phambili”
Ingcwethi ezibona ngamalungelo ezisebenzi zithi ukuxoxisana kukahulumende lezisebenzi zakhe kuyinto eqakathekileyo njalo ehlala isenziwa kodwa impumela ayikaze ithokozise izisebenzi ngoba zibona kuphela umqhatshi esenza umathanda.
Uhulumende uvame ukupha izithembiso ukuthi uzakhangela izikhalazo zezisebenzi kodwa engaphutshisi izithembiso lezi. Abongi labongikazi abanengi sebechaphe imingcele betshiya imisebenzi elizweni ngenxa yomholo ongabaphilisiyo njalo belanda amathuba angcono kulalawa abawathola elizweni.
Abongi bakhala ngokuthi akusebenzeki nxa bezamele bacabange ukuthi imuli zabo zizakudlani ngapho kumele banake imiphefumulo yabantu. Abanye njalo bathi sebephila ngokuthengisa khona emisebenzini okuyikho okubaphilisa ngcono kulemali abayiphiwayo.