JOHANNESBURG.............
Uhulumende waseSouth Africa ubika ukuba usebize ummeli weMelika kulelo lizwe, umnumnzana Reuben Brigety ukuthi azophendula imibuzo ngodaba lwakhe lokutshela abezindaba izolo ukuthi eleSouth Africa liphe uhulumende waseRussia izikhali zempi, ngesikhathi kutshisa impi yeleRussia leleUkrane.
Ingcitshi ezicubungula ezombusazwe zithi ukufuthelana okukhona phakathi kweleSouth Africa leleMelika khathesi kulamandla okudunga ubudlelwano bamazwela womabili kucine kuphazamisa lobudlelwano bamazwe asemhlubulweni wangezansi kwezwekazi le Africa
Umnumnzana Brigety utshele ebezindaba izolo ukuthi ufunga ngempilo yakhe ukuthi umkhumbi weleRussia owafikela eSimon’s Town ngoMpalakazi nyakenye wasuka usugcwele izikhali zempi ezasetshenziswa yiRussia ukulwisa ele Ukraine.
Ingcitshi ecubungula ezobudlelwano bamazwe atshiyeneyo womhlaba, umnumnzana Thembisa Fakude ongumncwaningi enhlanganisweni yeAfrica-Asia Dialogue uthi inkulumo kaBrigety le iveza ukuthi ulobufakazi obubambekayo ngaloludaba okuyinto ezafaka eleSouth Africa enkingeni enkulu.
“Singazithola sesixotshiwe kumanyano we AGOA, obusipha iSouth Africa ithuba lokuthengiselana leMelika impahla ezifika amabhiliyoni angamatshumi amabili amadola.”
U-Fakude uqhubeke ethi kulengozi yokuthi eleSouth Africa lingazithola selisetheswa izijeziso zomnotho okuzakwenza impilo ibe nzima kumuntu wonke elizweni jikelele.
Kodwake eleSouth Africa lithi aliyijabulelanga inkulumo eyethulwe nguBrigety. Umphathintambo wogatsha lwezokuxhumana unkosikazi Khumbudzo Ntshavheni utshele abezindaba ukuthi bakhathazekile kakhulu ngenkulumo kaBrigety.
“Akusiyo indlela okukhulunywa ngayo nxa umeli welizwe elento ayisolayo. Uphambanise kakhulu ummnumnzana Brigety.”
Ngakwelinye icele uMongameli Cyril Ramaphosa utshele idale lephalamende ukuthi uzabumba ikomishini ezacwayisisa ngaloludaba.
Kodwake umkokheli webandla eliphikisayo kweleSouth Africa eleDemocratic Alliance umnumnzana John Steenhuisen uthi akuzwisiseki ukuthi kungani kuthiwa kusahlolisiswa lokhu sekulenyanga eziyisithupha lesi sehlakalo senzakala.
Ubudlelwano bele South Africa leleRussia buqale ngesikhathi sempi yobandlululo kulelo lizwe lapho eleRussia lasekela kakhulu inhlelo zokulwisa umbuso wobandlululo wabamhlophe.
Selokhu impi yeRussia leUkraine yaqalayo eleSouth Africa alikaze lisole iRussia ngaphandle kokuthi amacele womabili kuzafuze akhulumisane, ikhetha ukungathathi icele.
Enyangeni ezedluleyo iSouth Africa yemukele abaphathintambo beRussia kanye leMelika yathembisa ukuqinisa ubudlelwano bawo lamazwe womabili.
Kodwake ingcitshi ezicubungula ezombusazwe lezobudlelwano lamanye amazwe, zithi osekusenzeka manje eleSouth Africa lizithola selidabukene phakathi kwamazwe womabili njengoba ngakolunye uhlangothi lifuna ukuqhubeka liqhuba ezamabhizimusi leMelika kantike ngakolunye lisafuna njalo ukugcina ubudlelwano balo bakudala leleRussia.
Kusenjalo eleSouth Africa lithi lingaqeda ukubuzisisa uBrigety ngenkulumo yakhe ayethulele abezindaba, umphathintambo wezokudlelana kweSouth Africa lamanye amazwe womhlaba, uNkosikazi Naledi Pando, uzakhulumisana losowabo weMelika ebeka sobala ukukhonona kwelizwe lakhe ngendlela uBrigety aziphathe ngayo.
