Amabizo abantu abanengi awekho kuluhlu lwabavoti.
Abantu laba bagoqela lamalunga edale lephalamende labake bancintisa abafana lomsekeli kaMongameli webandla le CCC uMnu. Welshman Ncube loNkosikazi Nichola Watson.
Ikhomisheni yezokhetho, eye ZEC, ivule ugwalo loluhlu lwabavoti ngomgqibelo kusiyafika ngolwesithathu ukuze uzulu ahlole loluluhlu ukwenzela ukuthi nxa kulamaphutha alungisiswe.
Inengi lithole amabizo engekho kumbe esuswe lapho abahlala khona asiwa kwezinye izabelo zelizwe.
Sixoxe lesikhulumeli sebandla le CCC koBulawayo, uMnu. Swithern Chiroodza.
Imizamo yokukhuluma le ZEC yehlule kodwa omunye wakhokheli be ZEC, uMnu. Utloile Silayigwana wethule umbiko ngoLwesihlanu esithi ezinye indawo zokuhlola amabizo zizaphuza ukuvulwa okuzabangela ukuthi loluhlelo lwengezelelwe amalanga kulezondawo ezizaphuza ukuvulwa.
Lokhe sikudaba olufanayo, abanye bathi ukungahleleki kohlelo lokwaba izigaba zokuvota kungaba sekuphuma egcekeni ngoba uluhlu lwabavoti lumanikiniki.
Umkhokheli webandla le MDC-T, uMnu. Douglas Mwonzora wahambisa udaba lohlelo lwe delimitation emthethwandaba esithi kumele loluhlelo luqutshwe kakutsha.
Sixoxe lesiphathamandla sebandla le Zanu PF, uMnu. Kudakwashe Munsaka ozancintisa eBinga North efuna ukuba lilunga ledale lephalamende, saqala ngokumbuza ukuthi umkhankaso uhamba njani?
Forum