JOHANNESBURG, SOUTH AFRICA - Amakhulu ezizalwane zakwale South Africa bebetshengisela ngoLwesine emahofisini kaMongameli uCyril Ramaphosa besithi akaxotshe bonke abantu bokuza abaselizweni ngokungekho emthethweni.
Abebetshengisela laba abagoqela amalunga enhlanganiso yeOperation Dudula, leSisonke People’s Forum lezinye bafike emahofisini kamongameli Ramaphosa becula, begida njalo bememeza besithi akabatshele ukuthi bazohamba nini abantu bokuza abaselizweni ngokungekho emthethweni.
Obona ngokuqoqwa kwalokhu kutshengisela, uMnumnzana Freeman Bhengu, wethese uhulumende kaRamaphosa umlandu wokwekela abantu bokuza bengena santando elizweni bezenzela umathanda.
“Ama South Africans athi aneproblem yamaforeigners, abantu abaza ngaphandle.Sifakile irmemorundum ukuthi ugovernment enze istate of emergency la eSouth Africa. Abize amasotsha azoncedisa nga this thing.”
Omunye wabebetshengisela wethese izizalwane zakwamanye amazwe umlandu wokubangela inhlupho zonke ezibhekane leSouth Africa kwezomnotho lenhlalo kazulu.
UMnumnzana Nkazimulo Dlomo, owenhlanganiso yabatshayeli bamaroli eye All Truck Drivers Foundation, uthi umsebenzi wonke wokutshayela imota ezinkulu usuthethwe ngabantu bokuza.
“Asilwi nabo abafowethu but silwa necorruption. Umthetho ukhona. Kumele usebenze coz ubhalwe yibo lapha ephalamende. The way okwenzeka ngakhona sibona engathi awusebenzi coz uthola ukuthi lomuntu akanawo namaphepha okuba seSouth Africa but ula eSouth Africa kodwa uyadriver.”
UNkosazana Zandile Dabula, owenhlanganiso yeOperation Dudula, laye obekulokhu kutshengisela uphikile ukuthi ukutshengisela kwabo lokhu yisenzo sokucwasa ngobuzwe.
"Sifuna umass deportation. Sifuna ukuthi abantu bala ekhaya basebenze babeprioritised kuwo wonke ama health care centres, nezikolweni sisaselabantwana esisabalwela ezikolweni because abanaspace but abantu bangaphandle bakhona ezikolweni.”
Ukutshengisela lokhu kuza ngesikhathi ubuyanga lokusilela kwemisebenzi kusanda kwele South Africa. Kuza njalo ngesikhathi lapho sekusele amaviki ambalwa ukuthi izizalwane zeZimbabwe eziphose zifike izinkulungwane ezingamakhulu amabili zixotshwe elizweni ngemva kokuba uhulumende alile ukwengezela isikhathi samapermit abo.
Eminyakeni edluleyo kube lezehlakalo ezinengi zokuqhamuka kodlakela lwexenophobia izizalwane zakwale South Africa zisethesa ezakwamanye amazwe umlandu wokubathathela imisebenzi lokudala amacala.
UMongameli Ramaphosa akaphumanga ukuthatha izikhalazo zabebetshengisela laba kantike bona bathembisela ukuthi bazophinda babuye futhi.
Izizalwane zeZimbabwe zona zithi akusizi ukutshotshozela ukuthi baxotshwe kwele South Africa isimo esabasusa eZimbabe singakalungiswa.
Forum