MATEBLELAND SOUTH -- Ukuqonga kwentengo yempahla ezitolo sekutshiye izakhamizi zemaphandleni zisidla luklubhu, inengi lazo livele libhekane lendlala embi ngoba lingavunanga lutho emasimini.Izakhamizi zithi ukudla akusathengeki ezitolo osekudale indlala ephindwe kabili. Lanxa uhulumende esiza izakhamizi ngomumbu inengi lithi lokhu akusizi ngalutho ngoba inengi lingawuphiwa njalo esikhathini esinengi uyabe uwonakele.
Uzulu wemaphandleni uthi intengo yempahla ebalisa impuphu, itshukela kanye lamafutha okuphekisa isingaphezu kwamandla abo osekubatshiye besendlaleni embi.
UNkosikazi Siphathisiwe Nkala oyisakhamuzi seSilikwe eGwanda North uthi lonyaka bavele abatholanga lutho emasimini kulandela ukuna kwezulu elilutshwane.
“Isivuno kasisihle kakhulu lonyaka ngoba abantu balima nzima ngodubo lwenhlanyelo kunjalo kwabuya izulu lahamba lazobuya umumbu sutshile kungakho akula sivuno esikhona sindlala zodwa sibili, into engathi ingconywana abantu abangaba beyitholile ngamazambane okwamabele akulalutho.”
Ukuwa kwamandla edola leZimbabwe kumaviki adlulileyo sekudale ukuqonga kwentengo yempahla ezitolo kutsho uNkosikazi Rose Nkala isakhamuzi seSitezi, eGwanda North.
“Ukudula kwezinto kulezinsuku akusaphilisi kuhle abantu ngingazi kumbe yena uhulumende njengoba emile ebukele engxenye kumphatha kahle kodwa kusiphilisa nzima langendlela okuwa ngayo iZim dollar hayi bo engxenye kuzalunga ngoba yinto ayikhangeleyo.”
UNkosikazi Julieth Nkiwane oyisiphathamandla senhlanganiso emela amalungelo abomama lamantombazana laye ukhala ngokuqonga kwentengo yempahla ezitolo.
“Okwentengo kunzima lokuthi sikhulume ngakho, impahla zikhwele okunye okwesabekayo, njengedola lakuleli ungahamba lalo uliphethe uyamangala iCoca Cola ikubizele Z$2000, abantwana bakuthumele irand ngenxa yomkhonomi walapha konke sekuworse abantu basebuyangeni obesabekayo.”
UNkosikazi Saziso Khumalo oweVokola uthi lanxa uhlelo lukahulumende olokusiza uzulu wemaphandleni ngokudla soluqalile balutshwane kakhulu abathola lokhu kudla.
“Uhlelo lukahulumende olweSocial Welfare soluqalisile kodwa uhlupho yikuthi bathethe abantu abalutshwane kakhulu okokuthi inengi eseleyo layo ayilalutho baphakathi kwendlala labo so besicela ukuthi ngabe uhulumende uyengezelela abantu bonke bathole ukudla ngoba bonke kukhanya belendlala enkulu.”
UNkosikazi Philippa Ndlovu oyisakhamuzi sikaWard 16 uthi bahlezi behola umumbu owonakeleyo sikhathi sonke kodwa uthi bawudla unjalo ngoba kungela ngeyinye indlela.
“Angisuthiseki ngoholo lwalamhlanje umumbu wakhona ubolile, ubolile kakhulu ukuthi siphonguthathela kuphela ukuthi sizathini.”
Umqondisi wogatsha lukahulumende olubona ngenhlalakahle kazulu eZansi yemaNdebeleni uMnu. Criswell Nyakudya uthi kuba lezikhathi lapho umumbu owonakala khona ngenxa yomumo yomkhatho kodwa lowo mumbu kumele izakhamizi ziwubisele emuva ukuze zithole okahle.
Kuliviki emnkambo wensitha idola leMelika elilodwa belithengwa ngamadola akuleli azinkulungwane ezine ZW$4,000.
Forum