HARARE - Sekusele amaviki amabili ukuba idale lokubhalisa amagama alabo abazancintisa kukhetho eleNomination Court lihlolisise amabizo abafisa ukungena kukhetho oluzakwenziwa mhlaka 23 Ncwabakazi.
Ibandla leZANU PF yilo lodwa phakathi kwamabandla amanengi eseliphutshe uhlelo lokubuthanisa amabizo alabo abazancintisa kukhetho lolu.
Ibandla leCitizens Coalition for Change, elikhokhelwa nguMnu. Nelson Chamisa, eleMovement for Democratic Change, elikhokhelwa nguMnu. Douglas Mwonzora, leleZAPU kawakazisi uzulu ukuba ngobani abazancintisa kukhetho oluzayo.
Kwaziwa kuphela ukuba inkokheli yamabalandla la izancintisa kukhetho lokudinga umongameli omutsha. Umsekeli wesikhulumeli sebandla leCCC, uMnu. Gift Ostallos Siziba, uthi ibandla lakhe selizaphutsha ukukhetha abazalimela kukhetho oluzayo.
Obona ngokwethulwa kwemibiko kubandla leMDC-T, uMnu. Witness Dube, uthi ibandla lakhe lizakwazisa uzulu ngabantu elibakhethileyo ngemva kokuba iCCC isigqibe uhlelo lweConsensus Candidates’ Selection Process.
Elinye njalo ibandla elifisa ukuncintisa kukhetho lwalonyaka ngele ZAPU. Isikhulumeli sebandla leli, uMnu. Msongelwa Ndlovu, uthi akusensuku zatshwala bengakazisi uzulu ngamabizo abantu abazancintisa kukhetho oluzakwenziwa mhlaka 23 Ncwabakazi.
UMnu. Admire Masikati, okubandla leZanu PF, uthi kusobala ukuba ibandla lakhe selilungiselele ukhetho oluzayo.
EleZimbabwe lizaqhuba ukhetho lwamakhansila, amalunga edale lephalamende lolokudinga umongameli omutsha.
Forum