MARYLAND - Abantu abahlala emaphandleni bathi sebephila nzima ngenxa yokuwa kwesisido sedollar leZimbabwe. Bathi abanye abantu sebezenzela umathanda emaphandleni okuthengiswa amajodo, umtshwankela, umviyo lokunye okuthakazelelwa nguzulu.
Abahlala emaphandleni bathi idollar leZimbabwe ligududeka ngamandla emkambo wemali kahulumende njalo lowensitha, okwenza ukuba bengenelisi ukuziphilisa.
NgoLwesibili, idollar elilodwa leMelika lithengwa ngamadollar phose azinkulungwane ezine zamadollar eZimbabwe – 3,674 Zimbabwe dollars emkambo kahulumende. Libiza amadollar afika inkulungwane eziyisithupha – 6,000 Zimbabwe dollars kweminye imkambo yensitha. UNkosikazi Tryphine Mpala, owesigabeni seNyamandlovu eMatabeleland North, uthi lokhu kwenza ukuba behluleke ukuphandela imuli ukudla lokunye.
Isakhamusi seKwarai eLupane, uMnu. Thembelani Moyo, ulombono ofanayo.
Kodwa uMnu. Believe Gaule, olevinkili eTsholotsho njalo okubandla leZanu PF, uthi kulabantu abadala ukuwa kwedollar leZimbabwe.
UMnu. Fortune Mlalazi, okubandla leCitizens Coalition for Change, kavumelani laye.
Othengisa imali emkambo wensitha, uMaNkomo, uthi idollar leZimbabwe lithengiswa ngendlela ezitshiyeneyo.
Kukhangelelwe ukuba idollar leZimbabwe lizaqhubekela phambili lisiwa. Lalahlwa ngomnyaka ka2009 kulandela ukugugudeka komnotho okumangalisayo.
Forum