WASHINGTON DC – Amabandla ezombusazwe athi aselungele ukubhalisa labo abazancintisa bewamele kukhetho oluzayo kumadale eNomination Court kusasa.
UMongameli Emmerson Mnangagwa wazise kusikhatshana esedluleyo ukuthi abazancintisa kukhetho lolu bazabhalisa mhlaka 21 kulinyaka, kuthi ukhetho lona luqhutshwe mhlaka 23 ngoNcwabakazi.
Abazancintisa kukhetho lukaMongameli bazahlawula inkulungwane zamadola eMelika ezingamatshumi amabili, US$20,000 kuthi abancintisa kolwamalunga ePhalamende bona bahlawula inkulungwane eyodwa, US$1,000.
Amabandla amanengi akhala ngokuthi inengi kakhulu limali. Amakhansila wona akahlawuli lutho.
Umsekeli wesikhulumeli sebandla leCCC uMnu Felix Magalela Mafa Sibanda uthi ngemva kokubhalisa abazancintisa bemele ibandla lakhe kusasa, bazakwethulela uzulu amabizo abo.
Ilunga leZanu PF Central Committee uMnu Joseph Tshuma laye utshele iStudio 7 ukuthi sebemelele ukubhalisa kusasa.
Forum