amalinks wokungena

Breaking News

Balitshumi Lanye, 11, Abaphumelele Ukubhalisela Ukuncintisa Kukhetho lukaMongameli


VaNelson Chamisa naVaEmmerson Mnangagwa
VaNelson Chamisa naVaEmmerson Mnangagwa

WASHINGTON DC – Ikhomishini elawula inhlelo zokhetho, eyeZimbabwe Electoral Commission (ZEC), ithi balitshumi lanye, 11, abantu abaphumelele ukubhalisela ukuncintisa kukhetho lukaMongameli oluzaqhutshwa ndawonye lolokudinga amakhansila lamalunga edale lePhalamende ngoNcwabakazi mhlaka 23.

Lokhu kwaziswe ngumsekeli kamgcinisihlalo walikhomishini uMnu Rodney Kiwa ekhuluma emsakazweni weZTN ntambama izolo.

UKiwa uthe abantu abangamatshumi amabili lanye, 21, bebefake amagama abo befuna ukuncintisa, kodwa uthe abanye behlulekile ngezizatho ezitshiyeneyo ezigoqela ukuswela imali ezinkulungwane zamadola eMelika ezingamatshumi amabili, US$20,000 ebifunakala.

Abaphumeleleyo babalisa uMongameli Emmerson Mnangagwa oweZanu PF, uMnu Nelson Chamisa oweCCC, uMnu Savior Kasukuwere olilunga elizimeleyo, uMnu Douglas Mwonzora oweMDC, uMnu Lovemore Madhuku owebandla leNCA loMnu Joseph Busha oweFree Zim Congress.

Abanye ngabathi uMnu Trust Chikohora oweZimbabwe Coalition for Peace and Development, uBlessing Kasiyamhuru owebandla leZimbabwe Partnership for Prosperity, uMnu Wilbert Archbald Mubaiwa oweNational People’s Congress, uGwinyai Muzorewa oweUnited African National Council kanye loHarry Peter Wilson owebandla leDemocratic Opposition Party.

Ngo2018 kuncintise abantu abangamatshumi amabili lantathu, 23, kukhetho lukaMongameli.

Forum

XS
SM
MD
LG