HARARE -- Abafelokazi baseZimbabwe bamanyane labamazwe womhlaba ekunanzeni ilanga ele International Widows Day besithi bafuna uhulumende kanye labenhlanganiso ezizimeleyo ukuthi labo babanike amathuba okuzithuthukisa ukuze baphume ebunzimeni bobuyanga ababhekane labo.
Lokhu kuphume embuthanweni wokunanza leli langa labafelokazi owenzelwe e Harare, namhlanje oqoqwe ngumanyano owe Circle of Comfort owabunjwa ngenhloso yokuthi babekwazi ukuthembela komunye lomunye wabo njalo basizane ezinkingeni ababhekene lazo.
Omunye wabafelokazi unkosikazi Lucia Tshuma waseHwange eVukuzenzele Village phansi kwenduna uMvuthu upha umbono wakhe.
“Ngatshiywa ngubaba ngo2016 so ngasala labantwana abangu six, ekukhuleni kwabo bakhula nzima ngoba esikolo ngangisehluleka ukuthi ngibafundise ngani lakhathesi abanye abafundanga bacina kuGrade 7. Ukubakhulisa kwabo ngabakhulisa nzima lokudla babengakutholi, kabatholi ukudla lezigqoko azikho impahla lokudla lokufunda abafundanga abanye bacine kuGrade 7.”
Uthi ufisa ngaye bayasizwa abafelokazi njengaye Lokhu kusekelwe ngunkosikazi Tshuma.
“Khathesi sengilokungabazukulu okuzintandane okuncane engiswela ukuthi ngizakwenza njani loba kugula. Lokudla akulakudla loba kugula ngiyaswela lemali yokukusa esibhedlela. So ngithwele nzima ngoba ngingumuntu ongumama angilakho engingazincedisa ngakho.”
U-Councillor Given Moyo weKachechete ward eHwange West eMatebelelanbd North ulandisa ngokunye ahlangana lakho ehlangothini lwabafelokazi ekusebenzeni kwakhe lomphakathi.
“Abafelokazi, uyatshiywa ngumkakhe kungela lapha angabamba khona kwezomnotho engasebenzi atshiyelwe abantwana endlaleni, atshiyelwe abantwana kungelamali eyokuthi bahambe esikolo, atshiyelwe abantwana kungela okokuthi bagqokani, atshiyelwe abantwana okokuthi ezempilakahle njengoba zihlupha kangaka, umuntu engagula uhanjiswa ezibhedlela abanye behamba eZambia.”
Uthi bayaludinga usizo abafelokazi elizweni uMoyo njengoba bebhekane lobunzima obuphindiweyo.
“Uyabe esetshiyelwe abantwana abangako eyehluleke ukuthi abaphakamise nganxa yakhonalokhu ukuthi umuntu lowo ubevele engelakho lapho abambe khona abesesala edubeka labantwana okwempilo yabo yonke abantwana becine bengafundanga ngendlela kade kufanele bafunde ngayo. Abantwana becine bengabantwana okokuthi khonokhuyana okwenzakalayo abantwana labana bezaqhubeka benjalo bedubeka.”
Umphathintambo wendaba zabesifazane lentuthuko yamabhizimusi amancane laphakathi laphakathi, unkosikazi Sithembiso Nyoni uthi bukhulu ubunzima obubhekane labesifazane ngakho kuqakathekile ukubathuthukisa lokubatholisa amathuba azobenza banelise ukuziphilisa.
“Babe yingxenye ye-politics ye-development yeZimbabwe laku-business yeZimbabwe. Lokho kuqakatheke ngokuthi omama yithi esibonayo okwenzakala kuma-families lakuma-communities ethu.”
Usuku lwabafelokazi, oluthakazelelwa minyaka yonke mhla ka23 Nhlangula, olwasungulwa ngumanyano wamazwe omhlaba oweUnited Nations luqondiswe ekumelaneni lobumpofu lokungavikeleki okubhekane lezigidi lezigidi zabafelokazi lalabo ababanakekelayo.
Forum