BULAWAYO - Ukuxokozela lokufuthelana kuyaqhubeka kubandla leZanu-PF lele Citizens Coalition for Change, eLower Gweru, koBulawayo lakwezinye indawo zelizwe.
Bayaxabana abazancintisa kukhetho labatshiywa phandle kwalo esigabeni seLower Gweru lezinye indawo lapho abanye abathi kwenziwe yikwehluleka kwamabandla amakhulu ukukhetho kahle abazabamela kukhetho oluzayo. Kulabanye njalo abathi kukhanya engani okunye kubangelwe yinhlanganiso yeForever Associates of Zimbabwe, edlelana lamapholisa ensitha aweCentral Intelligence Organization. KoBulawayo abangasangenanga ukuthi bancintise kukhetho bebetshengisela emahofisini aweCCC besithi baqilwa yinkokheli. UMnu. Matson Hlalo ubefuna ukuba nguSenator.
“Wangitshela ukuthi ahh ngiphuzile sebefake omunye, lokhu ngikukhuluma phambi kuka Nkulunkulu ukuthi lami kwangi shocker ukuthi yinto engenziwa ngo2023. 2023 kusenziwa into enjalo khona ukuthi ababephumelele why bengatshelwanga ngesikhathi."
UNkosazana Sithabile Sibanda, uthi abeCCC abakhethiweyo kabaziwa.
"Okwethu akukhanyi kulo uBulawayo, kuthethwe abantu esingabaziyo lemihlanganweni nxa kubiziwe umhlangano lapha abangabuyiyo lamhlanje yibo abalezikhundla ,abantu ahamba labo laba hayi hayi kananzelele ubaba akulalutho oluyaphuma"
Osakhulayo, owebandla leCCC, uThamsanqa Ndlovu, utshinga akazazi.
"Sithi abame abasebenzela ewofisini ngoba ngabathengisi bathola imali zeFAZ ,zaziyimali zeFAZ esezisebenza"
Obekufanele ancintise esigabeni seEntumbane-Njube edale lephalamende emele i-CCC, uPastor Tichaona Mujati, wasekhitshwa igama lakhe kungelasizatho, ucela ukuthula.
"Simyakhenini uBulawayo abe nguBulawayo omuhle ,uBulawayo olothando ,uBulawayo olokuthandana ,uBulawayo obambeneyo ,uBulawayo olabantu abaxolelanayo ,olabantu abayimbumba ,asibeni yinto eyodwa lizahamba liyekhampeyinela itripple C ukuze ujaha ayengaphi aye state house ,yikho hayi siyabonga uNkulunkulu asenzele kahle sonke."
Ukudonselana kubasekeli bamabandla la bonke bekhala ngokufanayo kuyaphambili lanxa ukhetho olukhulu luka Ncwabakazi solusondele.
Esabelweni seVungu, abahlali labasekeli bebandla leZanu-PF bakhala ngokuqilwa kommeli wabo edale lephalamende abathi ukhitshwe yi-FAZ yafaka umuntu ongasuye walesisigaba.
UNkosazana Sharmen Mpofu ngomunye wabazonde okwamagama.
"Kube lobumenemene obube khona, boba lamhlanje imdube ward iyakhala lama ward wonke nje akhona jikelele ayakhala ngobu khimbane obubekhona phakathi kwama voti la abekhona . Silezinyembezi ezinkulu kakhulu asikwazi siyazesulwa mbani ngo MP wethu ohlukuluzwe wakhitshwa esihlalweni . Yebo besifuna ukuthi siyithathe siyise ku tripple C, kuyenalowo okwanise ukuthi athole ama chance okungena."
Omunye okhala ngokufanayo nguMnunzana Thebula wase MaMbanjeni
“UOmega Sibanda ubeyindoda akade izama ngoba nanka ama irrigation asesalele endleleni angiboni ukuthi kusayaphutsha lokhuyana. Umuntu uma esebenza kuhle uyabukwa ,asoze kufike ukuthi loba engoweZanu sokungaze kufike ukuthi ungabuki, hayi into akade eyenza ibiyinto ade ikhanya iphumelelisa isigaba njengoba kwabamangalisa kukhanya kulokunye okwenzakalayo.”
Kukanti abeCCC kulindawo labo basola ozamela leli bandla eVungu kukhetho oluzayo, uNkosazana Loraine Bhebhe, bethi kaziwa ngabantu ngakho-ke uzadlisa lelibandla. UNkosikazi Gracious Tshuma uyakufakaza lokhu.
"Mina ngingowe tripple C, elikhokhelwa nguChamisa, iZanu iyathatha vele, iyathatha kubo MP lapha iyasithathela ngoba ngani umuntu lo ongenileyo besingamthakazeleli ,hayi besingamthakazeleli sibili besifisa ukuthi nga kungene umuntu ongubaba okade ezasenzela ngcono ,so umama lowu nguye osethethe kuma primary lapha asazi kusiya phezulu kodwa iZanu iyamthathela."
Umsekeli wesikhulumeli sebandla leCCC, uMnu. Gift Ostallos Siziba, uthi inhlanganiso yeFAZ esebenzela iZanu-PF yiyo edale ingxabano kubandla lakhe ngenxa yokuthi iyesaba ukuthi ibandla elibusayo lizanqotshwa kukhetho oluzayo.
"Ngenxa yokwethula ke isivuvungu esibuyayo esenguquko, iZanu yabisisiya forger ama signature. Kulabanye abanye ababengasikho kunhlanhlanganiso yethu abathi bayi triple C, abameli triple C. Indaba yokuforger iyicala elizweni leZimbabwe, yikho sibaripotile emapholiseni. Kulabo abangene entweni yeZanu-PF landelani umthetho ngoba uzalilandela kusasa. Lingaba engani lihlakaniphile namuhla kodwa kusasa kuzalilandela."
Umqondisi wenhlanganiso yeFAZ, uMnu. Kuda Munsaka, usanda kutshele iStudio 7 ukuthi inhlanganiso yakhe kayilani lokwenzakala kuCCC lamanye amabandla njalo laku Zimbabwe Electoral Commission.
"IFAZ ayizange ithathe I voters roll, iFAZ ayizange ngenele umsebenzi we ZEC, iFAZ yenza imsebenzi wayo owoku khampenela iZanu-PF. So ngakho ke lokho ngamanga aluhlaza ukubana iFAZ yenzanjalo. Ukhetho lokhetho siyakwazi ukuth abantu be opposition bayaphuma lezinto abayabe lezinto abayabe bekhala ngazo ukuthi bathi hayi lonyaka iFAZ ezayenza ukuthi badliwe bona bekwazi ukuthi bayadliwe.”
Akwaziwa ukuba kuzohamba njani ezigabeni ezinengi lapho okulabantu abahlaba umkhosi ngalabo abakhethwe ukuba bemele amabandla abo kukhetho olukhulu oluzayo.
Forum