HARARE -- Umthethwandaba waphezulu owe High Court, wahlulele isicelo somkhokheli webandla eliphikisayo ele United Zimbabwe Alliance, uNkosikazi Elizabeth Valerio, esokuthi avunyelwe ukuncintisa esikhundleni sokudinga umongameli welizwe kukhetho lwalonyaka, oluqhutshwa ngenyanga ezayo kaNcwabakazi.
Lokhu kungemva kokwalelwa kwengwalo zakhe ukuthi abhalise ukuncintisa ngabekomishini ebona ngezokhetho eye Zimbabwe Electoral Commission.
Ephanyeka lesi sicelo emthethwandaba igqwetha lakhe umnumzana Alec Muchadehama, uthe akula sizatho esibambekayo esingabe sense ukuthi abe ZEC bale ukwamukela ingwalo zikaNkosikazi Valerio.
U Muchadehama uthi uNkosikazi Valerio, wafaka imali eyayifuneka yonke ngesikhathi esasibekwe ngabe ZEC, ngakhoke babengamelanga ble ukwamukela ingwalo zakhe zokubhalisa. Uqhubeke ethi ukuphuza kwebhanga ukufikisa imali kwabe ZEC, ngesikhathi, ayisiwo mlandu wabo kodwa kuliphutha labebhanga hatshi elabo.
Igqwetha labe ZEC, umnumzana Tawanda Kanengoni, uthi inyathelo abalithetheyo lisemthethwei njengoba imali kaNkosikazi Valerio, yacina ingena isikhathi ababesibekile sesedlule.
U-Mahluli Samuel Deme wedale ele Electoral Court, , uthe uzakupha isinqumo kuloludaba ngesikhathi esilandelayo. Ingcwethi ezicubungula ezombusazwe kanye labanye abamabandla aphikisayo baveza imibono ehlukileyo ngodaba lukaNkosikazi Valerio.
Abanye basekela iZEC ukuthi waphuza ukuphanyeka ingwalo zakhe zokubhalisa ukuncintisa kodwa abanye njalo bemsekela ukuthi iphutha leziwa ngebebhanga ukuphuza ukufikisa imali kwabeZEC.
Abanye abenelisa ukubhalisa ukuthi bancintise kukhetho lwalonyaka lokudinga umongameli ngababalisa uMongameli Emmerson Mnangagwa oweZanu PF, omnumzana Nelson Chamisa oweCitizens Coalition for Change, Lovemore Madhuku oweNational Constitutional Assembly, Douglas Mwonzora owe MDC-T, Saviour Kasukuwere owayekubandla leZanu PF owabanjwa ngamandla ukuphuma kilo ngokugenqulwa kombuso kowayengumongameli welizwe umuyi umnumzana Robert Mugabe.
U-Kasukuwere ngomunye laye olodaba olusemithethwaba ephikisa isinqumo sokwaliswa kwakhe ukuncintisa kulolu khetho esethulwe lidale laphezulu ele High Court, ngesizatho sokuthi usehlale phandle kwelizwe okwesikhathi eside ngakhoke akala lungelo lokuncintisa. Kodwa amagqwetha akhe abika ukuba asekhweze lolu daba lokuphikisa isinqumo lesi emthethwandaba waphezulu owe Supreme Court.
Kolunye njalo udaba obelusemthethwandaba namhlanje, idale leHigh Court lilahle isicelo sowayengumsekeli womkhokheli webandla eleMDC-T, uMnu. Elias Mudzuri, esokuthi umhlangano owe Congress owakhetha ukuba, lelibandla likhokhelwe ngumnumzana Douglas Mwonzora, wawungekho emthethweni. Okulesikhathi eside ababili laba uMwonzora loMudzuri bephoselana ephilayo kubangwa ubukhokheli beMDC-T.
Forum