MARYLAND - Inhlanganiso yeZimbabwe Election Support Network (ZESN) lezinye ziqhuba inhlelo ezikhuthaza ukuthula elizweni ngesikhathi sokhetho oluzaqhutshwa ngoNcwabakazi lonyaka.
Kulabanye abathandabuza ukuba inhlelo lezi zizamisa udlakela olumemetheka okumangalisayo eZimbabwe.
I-ZESN, eqhuba uhlelo lweVote in Peace emigwagweni, isingene endaweni ezigoqela eGokwe, Magunje leNkayi lapho ekhuthaza uzulu ukuba akhankasele ukhetho oluzayo ngokuthula. Ezinye njalo inhlanganiso eziqhuba inhlelo ezifanayo ngeye Community Tolerance, Reconciliation and Development Trust leHeal Zimbabwe.
Benza lokhu kulandela imibiko ethi banengi abantu abahlahlanyezwa elizweni lonke jikelele ngabacatshangelwa ukuba ngabalandeli bebandla elibusayo.
UMfundisi Useni Sibanda wenhlanganiso yeZimbabwe Christian Alliance, uthi ziqakathekile inhlelo lezi.
USibanda uphinde wathi kuqakatheke njalo ukuba abantu bavikele abanye ngesikhathi sokhetho.
Lokhu kusekelwa nguNkosikazi Ellen Shiriyadenga, okubandla leCitizens Coalition for Change.
Uphinde wathi kumele kuhlonitshwe ilungelo likazulu.
UNkosazana Khethiwe Bhebhe, olandela ezombusazwe, uthi kunzima ukunqabela udlakela lwezombusazwe eZimbabwe ngesikhathi sokhetho.
UMnu. Joseph Tshuma, okudale leCentral Committee kubandla leZanu PF, uncoma okwenziwa zinhlanganiso ezitshiyeneyo ezilwela ukuba kuqhutshwe ukhetho olukhululekileyo.
UMongameli Emmerson Mnangagwa usekhulume kakhulu emphakathini ngokuthi kumele kuqhutshwe ukhetho olukhululekileyo eZimbabwe. Akwaziwa ukuba abalandeli bebandla lakhe bayamlalela kumbe hatshi.
Forum